IChiefs igcine isithembiso ngoNabi iqoqa amaphuzu eKapa

Stellenbosch FC (0) 0

Kaizer Chiefs (1) 2

IKAIZER Chiefs igcine isithembiso ngokwehlula iStellenbosch emdlalweni wokuqala wesizini ka-2025/2026 yeBetway Premiership e-Athlone Stadium, eKapa.

Amagoli aqinisekise ukuthi Chiefs ibuya namaphuzu amathathu avalelwe phakathi nguNkosingiphile Ngcobo kuyi-free kick esiwombeni sokuqala, kusaphele imizuzu engu-15 kuphela umdlalo uqalile, noGlody Lilepo obekuyiphenathi ngesikhathi esengezwe ngunompempe. 

IStellenbosch izithole isishoda kusaphele imizuzu engu-13 kuqale umdlalo kulandela ukukhishwa ngekhadi elibomvu kukaSiviwe Nkwali emuva kokudlalisa kabi uWandile Duba ngaphandle kwebhokisi eseyobhekana nonozinti. Okuqaphelekile esikimini seChiefs esiqale umdlalo wukuboshelwa komgadli osemncane uNaledi Hlongwane okhushulelwe esikimi esikhulu ekupheleni kwesizini edlule, esuka kweseDStv Diski Challenge, nobekungumdlalo wakhe wokuqala esigabeni sePremiership. Kanti ebhentshini leChiefs bekuhleli uKhalil Ben Youssef ongelinye lamaphini omqeqeshi uNasreddine Nabi ophuthume isigubhukane ekhaya, eTunisia, ngemuva kokulimala komkakhe ngoLwesihlanu. 

Ngokunqoba izolo, iChiefs isishaye iStellies emidlalweni eyisihlanu ilandelana kwazise ngesizini edlule iyixebule kane emiqhudelwaneni eyahlukene. Ukucosha kwayo amaphuzu akubuzwa ukuthi kubajabulisile abalandeli ababheke lukhulu kule sizini kwazise iqembu lisayinis inqwaba yabadlali abasha. Ngaphandle kwalokho, uNabi ubathembisile ngesonto eledlule ukuthi Amakhosi azoba yiqembu elihlukile kule sizini kwazise selivuthiwe ibhodwe abelipheka ngedlule lapho beqede khona isomiso ngokuwina indebe yeNedbank Cup.

Emuva komdlalo neStellies izolo, uYoussef uthe bathembisile ukuthi bazowina kwiStellies ngenxa yesimo abhekene naso uNabi.

"Kufanele ngisho ukuthi sithembise umndeni waMakhosi ukuthi sizowuwela umqeqeshi lo mdlalo senzele umkakhe ukuze abe ngcono, alulame. Siyaziqhenga ngabadlali, badlale kahle kakhulu. Sibe nenkinga kancane esiwombeni sokuqala emuva kokuba izimbangi zithole ikhadi elibomvu, sicabange ukuthi umdlalo usuphelile. Sibe nenhlanhla ukuthi asingenelwanga yigoli. Esiwombeni sesibili sishintshe izinto eziningi. Siyabajabulela abalandeli, yonke indawo kuhlala kusekhaya. Nabo bajabule manje ngoba sesiwuqedile lo mdlalo, sesizoqala ukucabanga ngomdlalo olandelayo esizowudlala nePolokwane. Sinezinsuku ezimbili zokuphumula, sekufanele sicabange ngomdlalo olandelayo,"kusho uYoussef kuSupersport.

Akubuzwa ukuthi abalandeli baMakhosi balindele ukuthi aqhubeke nomgqigqo omuhle uma esebhekene nePolokwane City eFNB Stadium, eNasrec, ngoLwesithathu ngo-7.30 ebusuku. Mancane amathuba okuthi uzobe esebuyile uNabi, okusho ukuthi uYoussef uzoqhubeka nokuyibamba benoCedric Kaze ongelinge lamaphini alo mqeqeshi waseTunisia.

Ngaphandle kokuwina kweChiefs, abalandeli bathakasele ukubona enkundleni umgadli osemncane, uNaledi Hlongwane, obedlala okokuqala esikimini esikhulu kulandela ukuzakhela igama eshaya amagoli kwiDStv Diski Challenge ngesizini edlule. Abanye abebedlubhe imibala yaMakhosi okokuqala nguThabiso Monyane noSiphesihle Ndlovu ongene ngesiwombe sesibili endaweni kaThabo Cele. UMonyane noNdlovu bebedlalela i-Orlando Pirates neSupersport United ngokwehlukana.

Ngasohlangothini lweStellies, uMuzomuhle Khanyi ohambe phambili ngokushaya amagoli kwiMotsepe Foundation Championship ngesizini edlule, udlale okokuqala egqoke ijezi kwiPremiership. Leli qembu limthole kwiHungry Lions. 

Enkundleni, nakuba iChiefs iqale ingaphezulu ngomdlalo kwiStellenbosch kodwa kwesesibili iqembu lasekhaya libuye selingcono futhi kuyilona elakhamathuba amaningi okukhahlelela ipali. Kubadlali abahlulwe ngamathuba kubalwa uLilepo noGaston Sirino ongene esiwombeni sesibili. Nokho kuphele konke ukungabaza ngesikhathi u-Omega Mdaka ewisa ebhokisini u-Ashley Du Preez ngesikhathi esengeziwe, unompempe u-Eugene Mdluli, wayikhomba emlotheni.