UFadlu usenegqubu leConfed ngokwenzeka esekwiPirates

UMQEQESHI waseNingizimu Afrika opheka iSimba SC yaseTanzania, uFadlu Davids, usayibambele igqubu i-RS Berkane yaseMorocco, ngokumphuca iqatha kowamanqamu weCaf Confederation Cup ngesikhathi esalolonga i-Orlando Pirates.

ISimba kaDavids ikhiphe iStellenbosch FC kulandela ukunqoba kwayo ngo 1-0 uma sekuhlanganiswe yomibili imilenze yowandulela owamanqamu weConfed.

Kowomlenze wokuqala owawuseZanzibar, emasontweni amabili adlule, iSimba yanqoba ngo 1-0 njengoba isibambana neStellies ngo 0-0 ngempelasonto edlule, eMoses Mbahida Stadium, eThekwini.

Le wini iqhathe iSimba neBerkane ezifake kowamanqamu ngokunqoba ngo 4-1 kwiCS Constantine yase-Algeria, kowandulela owamanqamu.

Eminyakeni emithathu edlule uDavids wayebambisene noMandla Ncikazi kwiPirates ngesikhathi beshaywa yiBerkane kowamanqamu weConfed sekukhahlelwa amaphenathi.

UThembinkosi Lorch, osesemabhukwini eWydad Casablanca yakhona eMorocco, nguyena owayelamulele iPirates ngemizuzu yokugcina. Kwaphinde kwaba uyena futhi uLorch owaba nebhadi lokugeja kumaphenathi.

Ukubambela iBerkane igqubu kukaDavids kuhlale obala ngempelasonto edlule, ngemuva kokuba iSimba izifke kowamanqamu okunika lo mqeqeshi - owaduma nakwiMaritzburg - United ithuba lokubhodla.

“Kuningi okuyisa umqondo wami kowamanqamu weConfed Cup yango-2022, neBerkane njengemiyalezo engikhumbuza ukusishaya kwayo ngisekwiPirates,” kusho uDavids.

“Ngeke ngikhulume iphutha kodwa lowo mphumela usangihlupha emphefumulweni.

“Akulula ukuthi ngiwukhohlwe ngoba safika kwiBerkane sigcwele ukuzethemba kade sidlule emaqenjini ayethathwa njenganzima ngaleso sikhathi okuhlanganisa neSimba.

“Nendlela esashaywa ngayo akulula ukuthi ngiyidlulise ngoba isicoco saphucwa sona sekusele kancane ukuthi sisiqukule,” kusho uDavids.

Nakuba uDavids engalifihli igqubu alibambele iBerkane kodwa ngeke avume limphazamise kwabakuhlelile ngale sizini.

“Sinemidlalo emine yeligi emqoka ngaphambi kokubuyela kwiConfed Cup ngakho-ke wonke mandla esinawo kufanele siwafake kuleyo midlalo.

“Likhulu igebe elikhona phakathi kwethu neYanga (Young Africans) kodwa angingabazi ukuthi kula masonto amabili ezayo sizolonciphisa.

“Likhona ithemba ngoba sisele kwiYanga nangemidlalo emine,” kuqhuba yena.

Esesonga, uDavids uxwayise ngensimu yaseMoses Mabhida ayichaze njengebingekho esimweni esikahle. Owamanqamu weNedbank Cup ophakathi kweKaizer Chiefs nePirates uzogijinyelwa kule nkundla yaseThekwini.

“Sikuxoxile lokhu mina noSteve (Barker) kodwa-ke mhlawumbe kuqondene nokuthi beliyidliva kwelikabhanana kulezi zinsuku,” kusho uDavids.