URabada ubeyiqhawe amaProteas ezifaka kowamanqamu we-ICC
UKAGISO Rabada ukhombisile ukuthi akagcini ngokushwiba kuphela ngesikhathi eshayela amaProteas ama-run amqoka emdlalweni weTest nePakistan Isithombe: BACKPAGEPIX
UKAGISO Rabada ubonakalisile ukuthi akagcini ngokuba wumshwibi ovelele kuphela ngesikhathi esiza iqembu lesizwe labesilisa lekhilikithi ukuthi linqobe iPakistan ngamawikhethi amabili emdlalweni wokuqala wochungechunge izolo.
Kulo mdlalo obuseSuperSport Park, eCenturion, uRabada ungene amaProteas esenkingeni njengobe ebeselahlekelwe amawikhethi ayisishiyagalombili, esashaye ama-run angu-99 kuphela kwangu-148 abewadinga ukuze anqobe umdlalo.
Ushaye ama-run angu-31 emabholeni angu-26, elakuleli lafiniyele kuma-run angu-150 kusaphume abadlali abayisishiyagalombili.
Iqembu lakuleli yilona elikhethe ukushwiba kuqala, lakhipha iPakistan inama-run angu-211. Liphendule ngama-run angu-301 kwi-innings yalo yokuqala. Izivakashi zibuye zashaya ama-run angu-237 kwi-inings yesibili.
“Ngesikhathi ngingena ngiyobhetha ngitshele uMarco (Jansen) ukuthi ngizozama ukudlala ngokuzethemba, kwangisebenzela lokho. Ngicabanga ukuthi naye udlale kahle, akazange atatazele, ubedlala ibhola ngalinye ngendlela efanele. Ngijabule ngoba sikwazile ukunqobisa iqembu,” kusho uRabada.
“Ngesikhathi ngiqala ukushaya amabhola aphumele ngaphandle kwenkundla ngibone ukuthi kufanele ngiqhubeke ngendlela engidlala ngayo. Ngizitshele ukuthi uma kwenzeka ngiphuma ngizamile ngeke ngiphatheke kabi. Bekuzongicasula ukukhishwa ngizama ukuzivikela.”
Ukunqoba lo mdlalo kuqinisekise ukuthi amaProteas azodlala kowamanqamu e-ICC World Test Championship ozobanjelwa eLord’s Cricket Ground, eLondon, ngonyaka ozayo ngoJuni, lapho ezobhekana khona neqembu elizothatha ithikithi lesibili phakathi kwe-Australia, India neSri Lanka.
Ukaputeni uTemba Bavuma, uthe lokhu okuzuzwe yiqembu kuzobuyisa ukuzethemba kubona bonke abayingxenye yekhilikithi kuleli.
“Lokhu kusho lukhulu, hhayi kimina kuphela kodwa nakumqeqeshi neqembu lonke. Asiyiqalanga kahle imidlalo yeTest ngesikhathi sidlalisa amaqembu ayengaqinile ngokuphelele sibhekene ne-India neNew Zealand. Ababningi abantu abebesibona sisethubeni lokwenza lokhu esikwenzile,” kusho uBavuma.
“Lokhu kukhombise ikhono esinalo eNingizimu Afrika nendlela esikwazi ukulwa ngayo. Kwesinye isikhathi siyazenyeza ngekhilikithi yakuleli, sisole abadlali abathile uma izinto zingahambi kahle kodwa uma sidlala kanje ngiyethemba ukuthi lizokhuphuka nethemba kubantu abalandela leli qembu. Ngifisa baqonde ukuthi laba badlali yibona abakulungele ukumela izwe.”
AmaProteas asezodlala umdlalo wesibili nePakistan, ozoqala ngoJanuwari 3, eNewlands Cricket Ground, eKapa, isiyehlile ingcindezi ebiphezu kwawo ngaphambi kokuqala kwalolu chungechunge.