OweSuper Giants akafuni baphazanyiswe ukunconywa

Ufuna bakhohlwe asebekwenzile bagxile emidlalweni ezayo umdlali weqembu laseThekwini elidlala kwiSA20, iDurban Super Giants, uHeinrich Klaasen, ukuze bangazitholi sebengaphansi kwengcindezi emasontweni azayo.

ISuper Giants isashosholoza kulo mqhudelwano ngemuva kokunqoba imidlalo emithathu ilandelana selokhu uqalile ngesonto eledlule.

Yawuvula ngokuthela phansi iMi Cape Town ngama-run angu-10 ekhaya, yaguqisa ompetha, iSunrisers Eastern Cape, ngama-run-angu-35 ekuhambeni, yanqoba iJoburg Super Kings ngama-run angu-37 eKingsmead Stadium ngoMsombuluko ebusuku.

Ukaputeni uKeshav Maharaj uwine ithosi bebhekene neSuper Kings wakhetha ukushaya kuqala. Iqembu lakhe liqale kabi lalahlakelwa amawikhethi amane lisahlanganise ama-run angu-34.

Litakulwe uKlaasen oshaye ama-run angu-61 emabholeni angu-41, laqeda ama-over angu-20 selihlanganise ama-run angu-145, lihlakelwe amawikhethi ayisishiyagalombili.

Bekungokwesibili lo mdlali eba yiqhawe kulandela ama-run angu-85 awashaya emabholeni angu-35 bejuqa iqembu laseKapa.

I-Super Kings ihlulekile ukuthola ama-run angu-146 ebiwadinga ukuze inqobe okokuqala kule sizini. Iqede ama-over angu-20 isaqoqe ama-run angu-108, yalahlekelwa amawikhethi ayisishiyagalombili.

Ukuhluleka kwaleli qembu laseGoli ukufinyelela okungenani kuma-run angu-116 kuholele ekutheni iSuper Giants ithole amaphuzu amane ngokunqoba umdlalo bese ibhanselwa ngelilodwa.

Leli qembu, elicijwa nguLance “Zulu” Klusener, liqhwakele kwi-log ngamaphuzu angu-13 emidlalweni emithathu.

“Bekungelula ukudlala kule nkundla ngaphansi kwezimo ebesibhekene nazo namuhla. Ibhola belingagqomi ngendlela efanayo futhi bekuvunguza nomoya. Kudingeke ukuthi ngibe nesineke ukuze ngijwayele ngabe sengiyakwazi ukudlala amashodi engiwathandayo,” kusho uKlaasen.

“Ngiyajabula ngoba ngiphinde ngakwazi ukusiza iqembu kodwa akukho okutheni engikwenzile. Ngeke ngivumele ukudlala kahle kule midlalo embalwa ukuthi kungenze ngizikhukhumeze ngoba ngiyawazi lo mdlalo, uyakwazi ukukubuyisela kwamhlaba uma usuhambela phezulu kakhulu.

“Ngisazoqhubeka nokuzikhandla ngidlale ngendlela ehambisana nesimo. Ngiyethemba ukuthi iqembu lonke lizimisele ngalokho ngoba iseminingi imidlalo esele kule sizini.”

I-Super Giants isizobhekana nePretoria Capitals eSuperSport Park, eCenturion, kusasa ngo-5.30 ntambama ngaphambi kokududulana neSunrisers eKingsmead Stadium, eThekwini, ngoMgqibelo ngo-1.30 emini.