Kubhekwe lukhulu kwi-SA20 ekhuza ibuya

Kulindeleke ukuthi ubuye ngesasasa elithe xaxa umqhudelwano wekhilikithi wakuleli iSA20, ofike nedumela ngesikhathi udlalwa okokuqala ngonyaka odlule. Lokhu kushiwo umqondisi walo mncintiswano, uGraeme Smith, ngesikhathi ephelezele okaputeni bamaqembu esithangamini nabezindaba eKapa ngoMsombuluko.

Umdlalo wokuqala uzoba phakathi kompetha, iSunrisers Eastern Cape, ezodudulana neJoburg Super Kings eSt. George’s Oval, eGqeberha, namuhla ngoLwesithathu ngo-5.30 ntambama.

Le ndebe izophinde ibangwe amaqembu ayisithupha afanayo nawangesizini edlule, iDurban Super Giants, Joburg Super Kings, MI Cape Town, Paarl Royals, Pretoria Capitals neSunrisers Eastern Cape.

Wonke aphethwe yizinkampani zase-India ezinamaqembu aseneminyaka edlala emqhudelwaneni wakhona, i-Indian Premier League.

Azosebenzisa izinkundla zakuleli eziyisithupha, okuyiSt. Georges Park, iNewlands Cricket Ground yaseKapa, iKingsmead Stadium yaseThekwini, iSuperSport Park yasePitoli, iWanderers Stadium yaseGoli neBoland Park yasePaarl.

Wonke amaqembu azobhekana kabili esigabeni samaqoqo, ekhaya nasekuhambeni, kusukela namuhla kuze kushaye uFebhuwari 4. Iqembu elinqobayo lizothola amaphuzu amabili kanti uma umdlalo uphela zibambene womabili amaqembu azothola iphuzu.

Amaqembu amane azoqeda phezulu kwi-log azodlulela esigabeni somkhumulajezi. Iqembu elizoqhwakela lizodlala neliqede isibili bese kuthi elinqobayo lidlulele kowamanqamu.

Elizohlulwa kulowo mdlalo lizophinde libange indawo kowamanqamu nelizonqoba phakathi kwalawa azoqeda endaweni yesithathu neyesine.

Lokhu kuchaza ukuthi selushintshile uhlelo njengoba nyakenye amaqembu amane abhekana kweyandulela amanqamu, kwathi anqobayo adlulela kowamanqamu.

“Ngiyethemba ukuthi ikhilikithi ezodlalwa emasontweni ezayo izozikhulumela futhi idonse abalandeli abangaphezu kwalaba esababona ngonyaka odlule,” kusho uSmith.

“Ngifikelwa umunyu ngoba ngiyawazi umsebenzi owenziwe emagunjini emihlangano, ezindizeni nakwezinye izindawo ukuze izinhlelo zethu ziphumelele.

“Ngike ngacabanga ngesikhathi usanda kusungulwa lo mqhudelwano sisazama ukuheha abadlali futhi silwela ukuthi umqhudelwano uhambe kahle. Sibonga bonke abantu abasisekile, okuhlanganisa abaxhasi nezinhlangano zokusakaza.

“Kufanele sibabonge kakhulu abadlali, abakuleli nabakwamanye amazwe, futhi sikubheke ngabomvu ukubabona benza abadume ngakho emasontweni azayo.”

ISunrisers izobe ibheke ukuvikela isicoco esithathe ngesikhathi inqoba iPretoria Capitals kowamanqamu ngesizini edlule.

U-Jos Buttler wase-England washaya ama-run amaningi kunabo bonke ngesizini edlule njengoba ahlanganisa angu-391 egijima kwiPaarl Royals.URoelof van der Merwe weSunrisers no-Anrich Nortje weCapitals yibona abashwibi ababeshisa njengoba bathatha amawikhethi angu-20 ngamunye.

Ukaputeni weSunrisers u-Aiden Markram, waqokwa njengomdlali ovelele kwazise waqeda umqhudelwano eseshaye ama-run angu-366, wathatha amawikhethi angu-11.

Umdlalo wanamuhla uzolandelwa ngowesibili ozoba seThekwini, eKingsmead Stadium kusasa, lapho iSuper Giants izobhekana neMI Cape Town ngo-5:30 ntambama.

IPaarl Royals izotholana phezulu nePretoria Capitals eBoland Park ngoLwesihlanu ntambama ngesikhathi esifanayo.

Amathikithi aseyatholakala eTicketPro. Kukhona akhethekile adayiswa ngo-R20, uma esephelile amanye ayatholakala ngo-R94.50 kuya ku-R180.