Kukhonye iTheku kumaSalga liwola izindondo

ISIFUNDA iTheku siphinde sashaya amaphiko emidlalweni yamaSalga ngokuwola inqwaba yezindondo ezinhlotsheni ezahlukene zemidlalo okubalwa i-ezamankomane, i-chess, umdanso, ne-tennis.

Isibili kube uMkhanyakude ngezindondo ezingu-16 zegolide, isithathu kwaba yiKing Cetshwayo ngezindondo ezingi-15.

Kweminye imiklomelo ekhethekile, i-Rugby KZN ihlabane ngomklomelo weBest Organised Federation, kwathi isiFunda uGu sahlabana ngoweBest Organised District Municipality.

Le midlalo yaminyaka yonke okuqhudelana kuwona izifunda ezingu-11 zaKwaZulu-Natal ezinhlotsheni ezahlukene zemidlalo, iqale ngoLwesihlanu yasongwa ngeSonto, eMhlathuze Sports Complex, eRichards Bay, ngaphansi kwesiFunda iKing Cetshwayo.

Kwathi eminye imidlalo okubalwa kuyo umdanso, umkhalambazo, amaknomane, yabanjelwa emahholo ehlukene aseMpangeni, eRichards Bay naseSikhaleni.

ITheku okugiye lona kwi-tennis, i-chess, i-dance, i-table tennis, ne-boxing, ebholeni labesifazane, nakwi-semi contact karate, liqoqe izindondo zegolide ezingu-41.

Nanyakenye, kwagiya lona kule midlalo eyayibanjelwe eNewcastle, esifundeni Amajuba.

UVamumusa Shabalala oyimenenja yeqembu le-boxing elidle umhlanganiso, uthe: “Ukubuya kwethu nezindondo zegolide ezingu-7, ezethusi ezingu-5 nezintathu zesiliva kusho lukhulu kithina njengoba ngonyaka odlule singayanga kumaSalga siyiTheku. Kanti ngaphambi kwalokho, sasigcine ngo-2019 ukwenza kahle kwi-boxing. Sijabule kakhulu ngokwenza kahle kwethu emidlalweni yakulo nyaka.

Ngakho-ke ukubuya kwethu ngale ndlela angingabazi ukuthi kuzobakhuthaza kakhulu abashayisibhakela bethu, baphinde benze okufanayo nangonyaka ozayo.“

Ongusihlalo weSalga, KwaZulu-Natal, uThami Ntuli, ukujabulele ukuhamba kahle kwemidlalo phezu kokuba ungaxhaswanga nguMnyango wezeMidlalo esifundazweni njengoba bekulindelekile.

“Injabulo enginayo iyachichima ngendlela le midlalo ebe yimpumelelo ngayo. Uma kuwukuthi mhlawumbe bakhona labo abebengafisi ihambe kahle, ngikholwa wukuthi bajabhile. UMnyango wezeMidlalo KwaZulu-Natal uthathe isinqumo sokuba uhoxe ekuxhaseni le midlalo. Nakhona awangasazisa ukuthi uyahoxa. Ezingxoxweni esibe nazo noMphathiswa wezeMidlalo savumelana ukuthi bazoba yingxenye yale midlalo njengomnyango.

“Kodwa-ke ngabe sengizwa ngomunye umhlangano owabakhona okwakukhona kuwo uNdunankulu wesifundazwe (uNomusa Dube-Ncube) namanye amalungu ekhabinethi, nokuyilapho okuvele ukuthi kwaba khona ukuphikisana, undunankulu ethi umnyango (wezeMidlalo) awungayixhasi le midlalo, abanye bethi ayixhaswe. Kodwa konke lokhu kwenzeka nje ngizwa ngendaba ngoba awusazisanga umnyango ngokuhoxa kwawo,” kusho uNtuli.

Ube esebonga abaxhasi abelule isandla ukuxhasa le midlalo, okubalwa kubona iMathole Funeral Services, iCebolethu Funeral, iThala Bank ne-Aquelle.