Kuhoxe izifunda kumaSalga ngenxa yokuntula imali
USIYABONGA Sangweni owazakhela igama kwi-Orlando Pirates neBafana Bafana, ungomunye wabadlali abavundululwa kumaSalga Games eminyakeni edlule, njengoba le midlalo yakulo nyaka ibanjelwe eMhlathuze Sports Complex, eRichards Bay Isithombe: BACKPAGEPIX
IQALE ngesasasa imidlalo yamaSalga Games eMhlathuze Sports Complex, eRichards Bay, yize zingekho ezinye izifunda ngenxa yokuswela imali.
Le midlalo yaminyaka yonke okudlana kuyona imilala amaqembu ezifunda zaKwaZulu-Natal ezinhlotsheni ezahlukene zemidlalo, idlalelwa esifundeni iKing Cetshwayo. Iqale ngoLwesihlanu, izosongwa ngoSonto.
Kulo nyaka ziyisishiyagalolunye izifunda eziqhudelanayo kulandela ukuhoxa kwezifunda ezintathu, uThukela, iHarry Gwala neMajuba, ngenxa yezinkinga ezithinta imali.
Lokhu kuqinisekiswe uSiwe Shabalala wakwaSalga, othe ukungabi bikho kwamaqembu alezi zifunda ezintathu, kungenxa yokushodelwa yimali komasipala balezi zifunda yokuhlelela abadlali bakhona ukuzoba yingxenye yale midlalo.
Emidlalweni yebhola lezinyawo,okuyiyona ekhombisa ukuba nesasasa elikhulu kubathandi bezemidlalo, iqembu labafana laseMkhanyakude okuyilona eladla umhlanganiso emidlalweni yanyakenye, liyivule ngonyawo ngokuguqisa uGu ngo 2-0, kwathi iKing Cetshawayo engosokhaya yaguqisa iTheku ngo 2-1.
Kanti emantombazaneni, uGu lubhaxabule uMkhanyakude ngo 5-2.
Kule midlalo eqhubekayo ngoMgqibelo nangeSonto, kubonakale umqeqeshi weqembu leRichards Bay FC elidlala kwiDStv Diski Challenge, uNkosenhle Ngema nephini lakhe uSibusiso Msomi. Le midlalo kade ihajelwe nanguTebogo Moloi weTM Scouts, owaziwa ngokuba neso elibukhali ekuvundululeni ithalente kubadlali bebhola basezigabeni zama-amesha. Kubadlali abaziwayo asebavundululile kubalwa kubo uMelusi Buthelezi ongunozinti we-Orlando Pirates noSbongiseni "Ox" Mthethwa odlala kwiKaizer Chiefs.
Eminyakeni edlule, amaSalga Games aqala ngo-1998 esaziwa ngeKwanaloga Games, avundulula ithalente labadlali okubalwa kubona uSiyabonga “Nsimbi” Sangweni noSiyabonga “Radushi” Nkosi abazakhela igama kwi-Orlando Pirates nakwiKaizer Chiefs.