Kwenzeke okulindelekile kuqokwa elamaProteas leyoMhlaba
BA UTEMBA Bavuma uzobe ehola iqembu lesizwe uma selidlala eNdebeni yoMhlaba ye-ODI Isithombe: BACKPAGEPIX
UGXILE kubadlali abelokhu ebasebenzisa selokhu ethathe izintambo ekuqaleni konyaka uRob Walter, ongumqeqeshi weqembu lesizwe lekhilikithi labesilisa lemidlalo yosuku olulodwa (ODI), ngesikhathi eqoka isikwati sabadlali abangu-15 esizodlala kwi-ICC Men's Cricket World Cup.
Lo mqhudelwano uzob se-India kusukela ngo-Okthoba 5 kuya kuNovemba 19. Angu-10 amaqembu azobanga le ndebe eyanqotshwa yi-England ekhaya ngo-2019. Azobheakna wonke eqoqweni elilodwa. Amaqembu amane azoqhwakela adlulele kweyandulela owamanqamu.
Yize abadlali abayisishiyagalombili abaseqenjini lamaProteas bezobe beqala eNdebeni yoMhlaba yemidlalo yama-over angu-50, iningi labo lalikhona eNdebeni yoMhlaba yeT20 nyakenye.
Iqembu lizoholwa nguTemba Bavuma, ongomunye wabadlali abazobe beqala ukudlala eNdebeni yoMhlaba yalolu hlobo lwekhilikithi.
UKagiso Rabada uzohola ithimba labashwiba ngesivinini ebambisene no-Anrich Nortje, Lungi Ngidi noGerald Coetzee. Kuthenjelwe kuKeshav Maharaj, Tabraiz Shamsi no-Aiden Markram ukuthi bashwibe i-spin.
Kwabashaya ibhola kuzobe kubhekwe uMarkram, Heinrich Klaasen, Quinton de Kock, Reeza Hendricks, Rassie van der Dussen noDavid Miller, kanti kwabakwenza konke kufakwe uMarco Jansen noSisanda Magala.
“Kuhlale kunzima ukukhetha isikwati seNdebe yoMhlaba futhi ngike ngasho ukuthi uma bebaningi abadlali abasezingeni eliphezulu, kuba khona abanye abasala ngaphandle,” kusho uWalter.
“Kuhle ukuba nengxube yabadlali abanamava nabadlali abazobe beqala ukudlala kulo mqhudelwano. Sizamile ukuhlanganisa laba abazofika nomfutho omusha, nasebemnkantshubomvu ukuze sithole iqembu elinamakhono ahlukene elizosivumela ukuthi simelane nezimo esibhekana nazo e-India.
“Nginethemba lokuthi sineqembu elizokwenza iNingizimu Afrika iziqhenye, lisebenza ngaphansi kobuholi bukaTemba.”
UWalter uzolekelelwa nguJP Duminy ozogxila ekubhetheni, u-Eric Simons ozobe ebhekene nezokushwiba noWandile Gwavu, ozosiza abadlali ngokuvimba nokunqaka amabhola enkundleni.
Khonamanjalo, inkakha yamaProteas, uDe Kock (30) umemezele ukuthi uzoyeka ukudlala imidlalo ye-ODI ekupheleni kweNdebe yoMhlaba. Waqala ukudlala lolu hlobo lwekhilikithi ngo-2013. Usedlale imidlalo engu-140 futhi wake waba ngukaputeni wamaProteas phambilini.
Iqembu lamaProteas leNdebe yoMhlaba:
Temba Bavuma (ukaputeni, DP World Lions), Gerald Coetzee (Momentum Multiply Titans), Quinton de Kock (Momentum Multiply Titans), Reeza Hendricks (DP World Lions), Marco Jansen (Dafabet Warriors), Heinrich Klaasen (Momentum Multiply Titans), Sisanda Magala (DP World Lions), Keshav Maharaj (Hollywoodbets Dolphins), Aiden Markram (Momentum Multiply Titans), David Miller (Hollywoodbets Dolphins), Lungi Ngidi (Momentum Multiply Titans), Anrich Nortje (Dafabet Warriors), Tabraiz Shamsi (Momentum Multiply Titans), Kagiso Rabada (DP World Lions) noRassie van der Dussen (DP World Lions).