Abe-karate eKZN bakhala ngokuchithwa uMnyango wezeMidlalo

ONGOMUNYE wabaholi be-karate KwaZulu-Natal ukhala ngokukhishwa inyumbazane kwalo mdlalo wuMnyango wezeMidlalo ezobuCiko namaSiko esifundazweni ngenxa yokungakutholi ukuxhaswa njengeminye imidlalo phezu kokwenza kahle kwabadlali bawo.

Oyiphini likasihlalo weKwaZulu-Natal Karate Federation, uShihan Bongani Gumede, ukusho lokhu ngemuva kokuba iqembu le-karate ebelimele iKZN kwiKyokushin Karate All Africa Tournament, eKapa ngeledlule, lenze ezibukwayo.

I-KZN ehlale ikhonya emiqhudelwaneni yomkhalambazo kazwelonke, iphinde yakhonya nakulo mqhudelwano wezinga lezwekazi, njengoba amakarateka angu-11 akulesi sifundazwe ezigabeni ezahlukene, edle umhlanganiso abe esezibekisela indawo kwi-13th World Full Contact Karate Championships.

Ngaphandle kwamakarateka angu-11 aseKZN, izwekazi i-Afrika lizomelwa ngamakarateka angu-19 okubalwa amane aseWestern Cape, amabili aseGauteng, elilodwa lase-Eastern Cape, nelilodwa laseReunion, kulo mqhudelwano ozobanjelwa eTokyo, eJapan, ngo-Okthoba.

Ïqembu laseKZN obekufanele limelwe ngamakarateka angu-63 kulo mqhudelwano obuseKapa ngenxa yezindleko zokuhamba nokulala, ligcine limelwa ngamakarateka angu-17 kuphela. Kudingeke ukuthi kuguge iphakethe ukuze akwazi ukuyobamba iqhaza.

“Iyasikhathaza kakhulu le nto thina be-karate lapha KwaZulu-Natal yokungalutholi kwethu usizo eMnyangweni wethu wezeMidlalo, ekubeni sikwenza konke okudingekayo ukufaka izicelo kodwa kube nhlanga zimuka nomoya.

Nakuba kusijabulisa ukwenza kahle kwamakarateka ethu kwi-All Africa, futhi akwazi ngisho nokuzibekisela indawo kwiWorld Karate Championshiops kodwa kusiphatha kabi ukuthi ngenxa yokungatholi kwethu uxhaso eMnyangweni wezeMidlalo, lokho kwenze sagcina simelwa ngamakarateka angu-17 kuphela, nakhona okupatanisiwe ukuthi ahambe,” kusho uGumede osesigungwini sikazwelonke seKarate South Africa (KSA).

“Sabhala izincwadi eziningi sicela emnyangweni, singaphendulwa. Sabhala incwadi yokuqala ngoSepthemba asangaphendulwa, saphinda sabhala enye futhi ngoFebhuwari nakhona asangaphendulwa. Kwaze kwaba yithina esilandelelayo sibuza, kwayima besitshela ngasekupheleni kukaMashi ukuthi abasenayo imal kodwa isicelo sasisenze kusenesikhathi.

“Asisazi ngempela ukuthi kumele senzeni ukuze sisizwe ngoba siyayihamba imihlangano ebizwayo (ngumnyango) ehlanganisa ama-federation ehlukene ezemidlalo esifundazweni, senze izethulo zethu, kudlule lapho singalutholi usizo kodwa abanye beminye imidlalo baphindaphindwe besizwa,” kusho uGumede.

Phambilini, i-karate beyimaqembuqembu eKZN nakuzwelonke, nobekwenza ingalutholi uxhaso olufanele eMnyangweni wezeMidlalo njengeminye imidlalo ekhona eNingizimu Afrika.

Nokho, manje lo mdlalo wenganyelwe yiKSA egunyazwe yiSouth African Sports Confederation and Olympic Committee (Sascoc).

Oyinhloko yezokuxhumana eMnyangweni wezeMidlalo KwaZulu-Natal, uThabo Mofokeng, obethembise ukuphendula “ngokushesha” imibuzo ebithunyelwe yiSolezwe nge-email ngoLwesine, kuze kwashaya isikhathi sokushicilela lolu daba engakaphenduli.