UDani Alves ukhuza ibuya kwiBarcelona

INDODANA yolahleko uDani Alves osebuyele ekhaya kwiBarcelona, yathathwa ixinwe kabi umdlali weBayern Munich uBastian Schweinsteiger kweminye yemidlalo yeChampions League okumele asebenze ngokuzikhandla ngokuthi izibekisela indawo kulo mqhudelwano ngokuphela kwesizini Isithombe: REUTERS

KUNGAKAPHOLI maseko iBarcelona iqashe uXavier Hernandez Creus, odume ngelikaXavi, njengomqeqeshi omusha isisayinise umakadebona wesiqongqwane uDani Alves osuka kwiSao Paulo FC yaseBrazil.

U-Alves (38) osekhuza ibuya kwiBarcelona, usayine inkontileka emfushane ezophela ngokuphela kwale sizini, kulindeleke ukuba aqale ukudlala ngoJanuwari kuleli qembu.

Akungatshazwa ukuthi ukuthatha izintambo kukaXavi kwiBarca kube nomthelela omkhulu ekunxenxeni u-Alves, obengasenalo iqembu kulandela ukunqamula kwakhe inkontileka neSao Paulo ngoSepthemba ngenxa yokungavumelani ngemali.

Amava ka-Alves oseyinkunzi emidwayidwa yiwona kanye alandelwe wona kuleli qembu eselicijwa nguXavi, odlale naye u-Alves kuleli qembu eminyakeni edlule.

Lesi siqongqwane saseBrazil sinqobe inqwaba yezicoco neBarca kumasizini ayisishiyagalombili sigijima kuleli qembu laseSpain, okubalwa kuzo ezintathu ze-Uefa Champions League nezintathu zeFifa Club World Cup.

Emuva kokumemezela ngokusemthethweni kweBarcelona ngokusayina kwakhe kuleli qembu, u-Alves akapholisanga maseko wabhala kwi-Instagram yakhe, ethi: “Ngangazi enhliziyweni yami naphakathi emphefumulweni wami ukuthi luzogcina lufikile lolu suku, noma bengingazi ukuthi kuzothatha isikhathi esingaka. Ngibuyela ekhaya engangingashiyanga kulona, futhi engangishilo ngaphambi kokuba ngihambe ukuthi ngingomunye walo.”

Dani Alves (C) of Barcelona celebrates with the trophy after winning the UEFA Super Cup match between FC Barcelona and Sevilla at Boris Paichadze Dinamo Arena in Tbilisi, Georgia, 11 August 2015. EPA/YURI KOCHETKOV

U-Alves osanda kunqoba indebe yama-Olympic neqembu lesizwe laseBrazil lika-Under 23, eTokyo, eJapan, enezezela kwezinye izicoco ezimbili zeCopa America nezimbili zeConfederation Cup azinqobe neBrazil, emuva kwamasizini ayisishiyagalombili ekwiBarca, ushiye leli qembu laseSpain ngo-2016 wajoyina iJuventus yase-Italy.

Waphinde wajoyina iParis Saint-Germain (PSG) yaseFrance adlale kuyona amasizini amabili, ngaphambi kokubuyela kwelakubo eBrazil ejoyina iSao Paulo ngo-2019.

EzikaXavi okumanje zihlezi endaweni yesishiyagalolunye kwi-log yeLa Liga, zizobuyela ensimini ngokududulana ne-Espanyol, kowomkhaya baseBarcelona, eCamp Nou, eBarcelona, ngoNovemba 20. - REUTERS