UMcCarthy ujabule ngokubuya kukaNtuli kuMaZulu
UBONGI Ntuli, umgadli waMaZulu FC, okunethemba lokuthi ukubuya kwakhe kuzoxazulula inkinga yokugeja eqenjini. Isithombe: BACKPAGEPIX
UKUBUYA kukaBongi "Mdeva" Ntuli noSphesihle Maduna kuMaZulu FC, kungase kube yisisumbululo senkinga ebhekene noSuthu yokushweba phambi kwamapali.
Lokhu kushiwo umqeqeshi waleli qembu uBenni McCarthy onganeme neze ngokuthi ezakhe zithole amaphuzu amabili kuphela, kwangu-12 obekumele ziwathole emidlalweni yakamuva.
UNtuli uyena obeqhulula amagoli kuMaZulu ngesizini edlule.
UMcCarthy usalokhu ekhale njalo ngokuba buthuntu kwezakhe phambi kwamapali kodwa kubuyise ithemba kuyena ukubuya kukaNtuli noMaduna, abathole ithuba lokudlala ngesiwombe sesibili Usuthu lubambana ngo-0-0 nabakhaya iMaritzburg United emdlalweni weDStv Premiership ngempelasonto.
Ubengeneme neze uMcCarthy ngokuthola iphuzu kuphela kwiMaritzburg, ikakhulukazi njengoba kuyibona abakhe amathuba amaningi emdlalweni. ULehlohonolo Majoro uyena obebhekwe yisambane njengoba ethole amathuba amabili obekumele awabeke enethini. Ngesiwombe sokuqala ibhola elihle likaMajoro lishaye ipali. Ngesiwombe sesibili uphume qekelele wabhekana nonozinti weTeam Of Choice, uJethren Barr, kodwa wehluleka.
"Ngibona ukuthi siphanise ngephuzu nje kwiMaritzburg, bekumele sinqobe. Ngiyazi abantu bathi iphuzu alifani nokungatholi lutho kodwa mina angiboni kanjalo. Sesiphanise ngamaphuzu ayishumi wonke selokhu ngifike lapha kuMaZulu. Kufanele sizame sishaye amagoli, yileyo inkinga esibhekene nayo. Ngijabule ukuthi uNtuli nomfana omncane uMaduna babuyile (ekulimaleni). Ukubuya kukaNtuli kuzosinika indlela ehlukile yokudlala nokuyinto engiyithokozela kakhulu. NoMaduna wenze kahle kakhulu ngethuba alitholile, ngicabanga ukuthi uma laba bobabili bengangena kahle egiyeni, sizoyilungisa inkinga yamagoli," kusho uMcCarthy.
UMcCarthy uthe ngeledlule, bachithe izinsuku ezintathu becija abagadlali babo phambi kwamapali, namanje umehluko awubonakali.
"Sizame konke ngeledlule, sichithe izinsuku ezintathu siziqeqesha ukuthi ibhola libekwa kanjani enethini. Size kulo mdlalo nokuzethemba okukhulu ngoba benze kahle abadlali siziqeqesha, sagculiseka kakhulu siyithimba labaqeqeshi. Ngiphoxekile ukuthi siphanise ngephuzu kwiMaritzburg kodwa ngiyazi ukuthi inkinga ayiyinkulu neze, indaba inepali," usho kanje uMcCarthy.
Njengoba kuvulwe iwindi lokudayisa kwabadlali, uMcCarthy akakufihlanga ukuthi kunabadlali abazolishiya iqembu lakhe.
"Yebo, kunabadlali esizobadedela impela. Asikwazi ukuma endleleni yabadlali abangalitholi ithuba lokudlala. Kodwa okunye futhi okufanele sikuqonde ukuthi nathi sidinga abadlali abambalwa ukuqinisa iqembu lethu. Ngiyavuma ukuthi sineqembu eliqinile kodwa ngiyakholelwa ekutheni singenza kangcono kakhulu kunalokhu," kusho uMcCarthy.
Kusasa AmaZulu azovakashela iSuperSport United eLucas Moripe Stadium ngo-5 ntambama.