Usaba ukushayeka kwebhola labesifazane

OWAYENGUKAPUTENI weqembu lesizwe, iBanyana Banyana, u-Amanda Dlamini, unovalo lokuthi kungenzeka ibhola labesifazane libuyele emuva ngokumiswa kwezinto ngenxa yeCoronavirus.

Akunyakazi lutho eNingizimu Afrika ikakhulukazi kwezemidlalo. Ibhola, elabesilisa nelabesifazane, limile. IBanyana bekumele ibe nomdlalo wokuhlungela i-African Women Cup of Nations kodwa wahoxiswa.

Inhlangano eyengamele ibhola, iSouth African Football Association (Safa), emasontweni edlule ikhiphe isitatimende esithi ibona kungcono ukuthi ukudlala kuze kuqale uma izwe selehlele esigabeni sesibili. 

Okwamanje izwe libekwe esigabeni sesine okubangwa wukuthi silokhu sinyuke njalo isibalo sabatholwa benegciwane nasebeshonile.

Izibalo zangoMsombuluko ziveze ukuthi sebengaphezu kuka-10 000 abahaqekile kwashona abawu-206.

Ngo-Agasti uDlamini nanabo kwiJVW kumele baqale ukudlala kwiSafa Women’s National League abakhuphukele kuyo emuva kokuphumelela kwiSasol Provincial League National Play-Offs.

Kodwa akukacaci ukuthi izoke iqale yini ngenxa yesimo ezweni. 

Iligi yalo nyaka ibingakapheli ngokwemidlalo, yize bese kucacile ukuthi iMamelodi Sundowns ingompetha ngenxa yogabagaba lwegebe ebese ilivulile ngenxa yamaphuu ewaqoqile.

“Ngilokhu ngilalele ukuzwa ukuthi kuzothiwani ngeligi yabesifazane kodwa angizwa lutho.

"Kodwa ngokubona kwami lokhu (iCorona) kuzosibuyisela emuva." 

"Njengoba kuvalwe yonke into kuzofana nokuthi siqala phansi ngoba njengamanje akekho okhuluma ngebhola labesifazane ekubeni bese liqala ukuba sezindebeni zabantu abaningi,” kusho uDlamini.

Uthe kumphathe kabi nokuthi ngesikhathi ungqongqoshe wezeMidlalo, uNathi Mthwethwa, ekhuluma ngabazohlumula kuhulumeni usiza ngezimali, akazange ayiphathe eyebhola labesifazane.

“Angizwanga ukuthi bangahlomula kanjani abadlali besifazane njengoba thina sidlala esigabeni sama-amesha,” kubeka uDlamini.

Ngesonto eledlule iSafa iveze ukuthi isifakile isicelo soxhaso emnyangweni futhi saphumelela. Esitatimendeni ithe ibifake isicelo sokusiza abadlali beBanyana futhi bakhokheliwe.

Nenhlangano yabadlali emhlabeni iFIFPRO isanda kusho ukuthi ibhola labesifazane lisengcupheni ngenxa yeCorona.

“Ngicabanga ukuthi ibhola labesifazane lizoshayeka kakhulu. Ibhola labesilisa lisesimeni esingcono ngokwemali futhi linakiwe ukuthi lizoqhubeka kanjani."

"Ngisho nasohlangothini lwepolitiki kunakwe lona kakhulu kunabesifazane. Lokhu kwenz ukuthi ibhola labesifazane kube yilo eligcina lishayeke kakhulu bese lihudululeka emuva nethuthuko ebese yenziwe kulo ingabonakali,” kusho unobhala weFIFPRO, uJonas Baer-Hoffman exoxa nabeSportstar Hindu,