Othathe isicoco ufuna bafingqele kahle iSafa
I-JVW yaseGauteng engompetha baka-2019 beSasol Provincial League National Play-Offs, ngemuva kokuhlula iMa-Indies yaseLimpopo kowamanqamu ngempelasonto eTsakane Stadium, eGauteng I-JVW yaseGauteng engompetha baka-2019 beSasol Provincial League National Play-Offs, ngemuva kokuhlula iMa-Indies yaseLimpopo kowamanqamu ngempelasonto eTsakane Stadium, eGauteng
UMDLALI weJVW uMamello Makhabane, oqokwe waba yiDiski Queen bedla isicoco sikazwelonke kwiSasol Provincial League National Play-Offs, ufuna babhukule ukuze baqhubeke nokwenza kahle nakwiSafa National Women’s League.
I-JVW yaseGauteng, okuyiqembu likakaputeni weBanyana Banyana, uJanine van Wyk, lidle isicoco salo sokuqala kule midlalo lihlula ngo 2-0 iMa-Indies yaseLimpopo emdlalweni wamanqamu eTsakane Stadium, ngempelasonto.
Lo mdlalo ubusonga umqhudelwano othathe isonto lonke. Iqembu laKwaZulu-Natal, iSunflower FC lithathe isithathu noR60 000 ngokubhaxabula ngo 16-0 iRoyal Wizards yaseNorthen Cape.
Ngokudla umhlanganiso kazwelonke, iJVW ihlomule ngesheke likaR200 000. IMa-Indies ithole uR100 000. La maqembu asezunyusa isibalo samaqembu adlala kwiNational, abe wu-14 ngesizini ezayo. INational League isungulwe nonyaka lapho kudlala amaqembu awu-12 aqhamuka ezifundazweni eziyisishiyagalolunye kuleli nompetha basenyuvesi.
Ukunqoba kukaMakhabane nozakwabo kufane nokubuyisa izinduku kwiMa-Indies ebashayile kusahlungwa.
“Sidlale nabo phakathi nesonto basihlula. Bese kuyisikhathi sethu sokubashaya. Sibafundile safika sesazi kahle okumele sikwenze. Senza lokhu ebesikuyalelwe wumqeqeshi. Siyaqala ukuwina le ndebe ngakho isho lukhulu kithina njengoba bekukhona nabantu abebengasifiseli okuhle. Sibonga ongaphezulu ngokuthi siphumelele,” kusho uMakhabane kwiSABC Sport.
Ngokudlala kwiNatiol League lapho iMamelodi Sundowns Ladies ingenantanga khona, uthe: “Kuzoba wumqhudelwano onzima kithina kodwa ngikholwa wukuthi ngamalungiselo esizowenza sizokwazi ukuthi sibe nesizini enhle nakhona.”
Umqeqeshi wabo, uCiara Picco uncome amava abadlali beBanyana ngokunqoba kwabo.
“Sinabadlali beBanyana abanesipiliyoni esikhulu njengoba iningi labo kade laqala ukudlala. Ngibona ukuthi leso sipiliyoni sisisizile, ikakhulukazi phambili lapho besigabe ngoDlamini (Amanda) noNyandeni (Nompumelelo). Isipiliyoni sisebenzile namumhla, ikakhulukazi esiwombeni sesibili lapho bese kumele sizame ukulawula umdlalo,” kusho uPicco.
Eminye imiklomelo ihambe kanje:
Player of the Tournament: Lebogang Ramalepe (Ma-Indies).
Young Player of the Tournament: Banele Madondo (Sunflower FC).
Top Goal Scorer (13 goals): Nelisiwe Luthuli (Sunflower FC).
Goalkeeper of the Tournament: Yolula Tsawe (JVW).