Uzobukwa nguyise uKolisi kowamanqamu eJapan
ABADLALI bamaSpringboks uSiya Kolisi noBeast Mtawarira bezilungiselela umdlalo wamanqamu ne-England. Isithombe: Reuters ABADLALI bamaSpringboks uSiya Kolisi noBeast Mtawarira bezilungiselela umdlalo wamanqamu ne-England. Isithombe: Reuters
UZOBE efuna ukujabulisa umndeni kanye nezwe lakhe ukapteni wamaSpringboks uSiya Kolisi uma amaSpringboks esetholana phezulu ne-England kowamanqamu eNdebe yoMhlaba ozodlalelwa eYokohama Stadium, eJapan ngoMgqibelo.
Amabhokobhoko azobe elangazelele ukunqoba lesi sicoco okwesithathu emlandweni njengoba begcine ukusiwina behlula yona iNgilandi ngonyaka ka-2007 eParis, France.
Ngokombhalo wenkosikazi kaKolisi uRachel Kolisi, uyise uFezekile Kolisi kanye nobabezala wakhe bazotheleka ngendiza eJapan bezokweseka amaSpringboks emdlalweni wamanqamu.
“Oyise bami basendleleni ebheke eJapan. Ubaba uzobe elibangisa okokuqala phesheya kwezilwandle. Siphila esikhathini esihle,” kubhala uRachel ekhasini lakhe ku-Instagram.
Lo mdlalo uzoba nomunye umlando kuKolisi njengoba ezodlubha imibala yamaBhokobhoko ihlandla lika-50.
Khonamanjalo, iSABC nenkampani iHeineken basayine isivumelwano esizovumela iSABC ukuba isakaze umdlalo wamanqamu weNdebe yoMhlaba kuzona zonke iziteshi zomsakazo ezingu-11 kanye nomabonakude.
Umdlalo wokuhlunga ozolala indawo yesithathu phakathi kweNew Zealand neWales uzosakazwa kumabonakude ngoLwesihlanu.
ISABC imemezele abakwaHeineken njengabaxhasi abasemthethweni abaqinisekise ukuthi izwe lithola ithuba lokubuka lomdlalo wamanqamu. Ekuqaleni kwesonto, iSABC iqinisekise ukuthi bafinyelele esivumelwaneni nabakwaSuperSport ngokuthola amalungelo okusakaza umdlalo wamanqamu kuSABC 2.
Imisakazo ezosingatha umdlalo wamanqamu yile: RSG; Radio 2000; Ukhozi FM; Umhlobo Wenene FM; Thobela FM; Motsweding FM; Lesedi FM; Ikwekwezi FM; Ligwalagwala FM; Phalaphala FM and Munghana Lonene FM, with live updates on SAFM.