‘IChiefs ihlezi iphiwa amaphenathi’ - Pitso
Umqeqeshi weMamelodi Sundowns uPitso Mosimane ugxeke unompempe ngokuncisha ezakhe iphenathi kumdlalo we-Absa Premiership bebhekene neBlack Leopards. Isithombe: BackpagePix Umqeqeshi weMamelodi Sundowns uPitso Mosimane ugxeke unompempe ngokuncisha ezakhe iphenathi kumdlalo we-Absa Premiership bebhekene neBlack Leopards. Isithombe: BackpagePix
UKHWELEwadilika kunompempe umqeqeshi weMamelodi Sundowns uPitso Mosimane okhale ngokuphikwa yisinqumo sephenathi emdlalweni wezakhe zishaya iBlack Leopards ngo 2-1 eThohoyandou Stadium, izolo ebususku.
ISundowns iye ekhefini ihamba phambili ngegoli likaThemba Zwane kanye negoli lomkhonto ogwaze ekhaya kaChris Katjiukua. Ukunqoba kweDowns kuyinyusele endaweni yesithathu kwi-Absa Premiership njengoba ingakahlulwa kule sizini.
IDowns ilandela emuva ngamaphuzu amahlanu kwiChiefs ezihola phambili kwiligi, kanti inemidlalo emibili esandleni njengoba idlala kwiCAF Champions League.
UMosimane uthe unompempe usabile ukunikeza ezakhe iphenathi, wabe esebeka umzekelo nge-Kaizer Chiefs.
“Bekumele sithole iphenathi. Umthetho omusha uvuma iphenathi uma ibhola lishaya isandla esiphakeme ebhokisini. Unompempe usabile, usaqhubeka nomthetho wakudala. Okwesibili lento yenzeka. IKaizer Chiefs ihlezi ithola amaphenathi. IChiefs iyitholile iphenathi ibhekene neGolden Arrows. Nathi kumele siyithole iphenathi, kumele sivunwe. IChiefs ivunwa yizinqumo zonompempe ezingamaphutha. Lento ayikho mayelana neChiefs, ngibeka amaqiniso. Kuyiqiniso elingenakuphikiswa lokhu,” kuchaza uMosimane ekhuluma nabeSuperSport ngemuva komdlalo.
UZwane, okhonjwa uPitso njengomdlali osethubeni lokumuka nesicoco somdlali ovelele ekupheleni kwesizini, ushaye igoli lakhe lesithathu kwi-Absa Premiership kule sizini, okumenza umdlali weDowns ohamba phambili ngamagoli kwiligi. U-Andile Jali oqale umdlalo okokuqala kwiligi eyibambe noHlompho Kekana esiswini, akaphoxanga njengoba ekhombise izinga elamyisa phesheya kwezilwandle eminyakeni edlule.
"Ngizoqhubeka nokukhuluma ngisho sihlulwa. Kodwa unompempe ubengabhedi kakhulu. Bekumele sibambe umdlalo uze uphele. Bekungamele sivume ukuhlulwa ekubeni besihamba phambili ngo 2-0. Cha bekungamele sikuvumele lokho. Ngiqinise isisu ngokufaka uSammy Seabi ukuze ezosiza uJali enkabeni yesisu. Okulandelayo bese kuyimizamo engabheke ndawo, besifuna ukuqeda umdlalo,” kubeka uPitso.
ISundowns izobhekana neHighlands Park kumdlalo wayo olandelayo we-Absa Premiership, ngo-Okthoba 23.