Bamfuna kwiChampions League uTau ogila izimanga eBelgium

SEBEZWAKALISE ukunengeka abathandi bebhola likanobhutshuzwayo eNingizimu Afrika ngesinqumo sikamqeqeshi weClub Brugge uPhillipe Clemment sokugquma uPercy Tau ebhentshini yize edlala ibhola elinenkosi phakathi.

UTau ungene ngesiwombe sesibili esuka ebhentshini emdlalweni weBelgian Cup njengoba iBrugge ishaye iFrancs Borains izolo ebusuku eRobert Urbain Stadium. UTau ushaye igoli lokuqala lomdlalo ngomzuzu ka-75, waphinda waphase amabhola amabili avalelwe enethini uDavid Okereke. 

UTau (25) ubengabonwa nangokhalo emdlalweni we-UEFA Champions lapho iBrugge idlale ngokulingana neGalatasaray ngesonto eledlule. Emuva kokudlala kahle izolo kanye nasemdlalweni weligi bedlala ngokulingana ne-Anderlecht, abalandeli bakuleli bamfuna enkundleni uma iBrugge isibhekene neReal Madrid ngoLwesibili kwiChampions League. 

Lomdlali obolekwe kwiBrighton & Hove Albion kuze kuphele isizini, useshaye amagoli amathathu, waphasa amabhola amathathu aholela egolini, njengoba esadlale imidlalo ewu-9 kule sizini. 

Ukuzimisela kukaTau sekumlandele izincomo kwabezindaba eBelgium ikakhulukazi intatheli uPeter Vandenbempt, othi uTau ukhombisa ukukhula ebholeni. 

“Phakathi kwabadlali abazimiselile emdlalweni we-Anderlecht kukhona uPercy Tau. UTau uthandwa kakhulu ngabaqeqeshi futhi ubenomfutho ngenkathi ecindezela i-Anderlecht. UTau ubevele eyinkinga kwi-Union Saint Gillose waphinde wenza isinqumo esikhaliphile ngokuthi ajoyine iClub Brugges,” kusho uVandenbempt ecashunwa yiVoetbalmagazine. 

UTau uzothola elinye ithuba lokuzifaka esikimi esizodlala kwiChampions League uma iBrugge isitholana neMechelen kwiBelgian Pro League ngoMgqibelo ntambama eJan Breydel Stadium.