Kufezeke isethembiso kumgijimi oza kabi

UMQEQESHI osezakhele igama kwezokugijima, uSamuel Sepeng obeke uCaster Semenya kwelinye izinga selokhu aba ngaphansi kwesandla sakhe, kubukeka sengathi uzoqhamuka nomunye umgijimi ozovelela ezingeni lomhlaba.

Lo mgijimi ophekwa uSamuel (ongumnewabo kaHezekiel), nguTshepo Tshite oqhamuke wadla ubhedu kungazelele muntu ku-800m kumaSenior Championships eGermiston ekuqaleni konyaka.

UTshite (21), ozalelwe eRustenburg, ungomunye wabagijimi abazomela iNingizimu Afrika kuma-African Games azoba seRabat, eMorocco, azoqala ngo-Agasti 16 aphothulwe ngo-Agasti 30.

USepeng utshele Isolezwe ukuthi ukuqokelwa kwalo mgijimi eqenjini eliyomela elakuleli eMorocco kugcwalise isethembiso asenza kuTshite ngesikhathi emncenga ethi akazozilolonga ngaphansi kweso lakhe elibukhali.

“Angikholwanga uma ngibona igama lakhe ohlwini lwabagijimi abazoya kuma-African Games.

“Ngesikhathi ngiqala ukumbona egijimela elinye iqembu eKlerksdorp ngabona okuthile kuyena okungajwayelekile kumgijimi obesuka emgwaqweni azogijima i-800m ngesikhathi esiwu-1:49 ngomzamo wakhe wokuqala.

“Ngamthembisa ukuthi uma ezozilolonga ngaphansi kwami uzokwazi ukushaya isikhathi esiwu-1:44 nesizomfaka kumaWorld Championship nakuma-Olympic.

Ngathi kodwa ngifuna ukuthi siqale ngokugijima kuma-African Games nokugcine kwenzekile. Uzothi esuka lapho ayogijima kuma-World Championship azoba seDoha, eQatar.

“Ngonyaka ozayo uzoyogijima kuma-Olympic nakhona engingangabazi ukuthi uyofike agile izimanga. Ngimbona ezohamba ezinyathelweni zikaHezekiel Sepeng noMbulaeni Mulaudzi ababuya nezindondo kuma-Olympic,” kuchaza uSepeng.

USepeng ngesikhathi ekhuluma okokuqala neSolezwe ngeSonto eGermiston Stadium, eKurhuleni, ngo-Ephreli, wathi uTshite ungomunye wabadlali abancane ababeke eqhulwini kubasubathi afuna ukugadla ngabo esikhathini esizayo.

Ngaphambi kokuthi uTshite ajoyine uSepeng ubekade eziqeqesha ngaphansi kukaPio Mpolokeng okunguyena owamvumbulula emakhaya eRustenburg lapho ayehlala khona nodadewabo njengoba bebengasenabazali.

Ukhulele enkulisa yeNedbank Running Club, eseKlerksdorp kanti ubekhona eqenjini ebeliye kumaCommonwealth Games, abeseGold Coast, e-Australia ngo-2017 lapho agijima khona ibanga eliwu-800m.

“Nakuba kungethusile kodwa bengibuye ngizimise isibindi ngoba kuyona yonke imijaho nonyaka akakaze aphume ngaphansi kwabagijimi abahlanu abebesuke bephume phambili ku-800m,” kusho uSepeng.

Abanye abagijimi ababhekwe ukuthi babe yizethenjwa zaseNingizimu Afrika kwezokugijima, abakhona eqenjini eliya kuma-African Games, ngoThando Dlodlo noSokwakhana Zazini.

UDlodlo usanda kungena endaweni yesibili emjahweni wamanqamu ebangeni eliwu-100m B e-Ostrava, eCzech Republic, ngoJuni nonyaka.

UZazini ubuye nendondo yesiliva kumaWorld Students Games, abeseNapoli, e-Italy.