AmaTuks azogadla ngowaduma kwiChiefs
UCOLLINS Mbesuma ogqame kwi-Absa Premiership uzodlalela amaTuks ngesizini ezayo. Isithombe; Backpagepix UCOLLINS Mbesuma ogqame kwi-Absa Premiership uzodlalela amaTuks ngesizini ezayo. Isithombe; Backpagepix
KUFANELE kube ngumlayezo ocacile emaqenjini adlala kwiNational First Division (NFD) ukuthenga kwePretoria University (amaTuks) abadlali abasha abaholwa yingwazi enguCollins Mbesuma, owaduma kwiKaizer Chiefs.
UMbesuma, njengensephe enguSiyabonga Nomvethe, ubalwa kubadlali abambalwa abayibambe kwiChiefs, Orlando Pirates nakwiMoroka Swallows - okungamaqembu amathathu amakhulu aseSoweto.
Enjalo nje, njengoNomvethe uMbesuma ubalwa kubagadli abahlanu abanamagoli angaphezu kuka-100 kwiPremier Soccer League.
UMbesuma uphethe irekhodi lamagoli amaningi ngesizini ngawu-34 awashayele iChiefs sekuhlanganiswe yonke imiqhudelwano ngesizini ka-2003/2004. Awu-25 aweligi yiwo ayirekhodi elisamile.
Ngesizini edlule lo mgadli waseZambia ubekwiMaccabi FC, ayisize isuka kwi-ABC Motsepe League.
Ukuthenga kwamaTuks lo mgadli kucacisela ngisho ingane encane ukuthi akhombisa ukuthi ngesizini ezayo azimisele ukulwela ukubuyela kwi-Absa Premiership.
Akusiye yedwa uMbesuma avuke ngaye amaTuks kwazise kukhona no-Athenkosi Dlala ongomunye wabadlali abebegqamile kwiMultiChoice Diski Challenge ngesizini edlule, Nqubeko Dlamini obengukaputeni futhi eyisethenjwa se-University of KwaZulu-Natal ngesizini yayo yokuqala kwiVarsity Football.
Sebebonke abadlali bamaTuks abasha:
uNqubeko Dlamini, Sphamandla Mntambo, Clive Gumede, Sphamandla Nzuza, Athenkhosi Dlala, Collins Mbesuma, John Tshabalala, Sphamandla Mlilo, Luvolethu Mpeta, Mosesenyane Maswanganye noKatlego Mohamme.