I-Eagles ayililahlile ithemba

AYILILAHLILE ithemba lokuzibekisela indawo kwi-Absa Premiership, iRoyal Eagles esale idangele ishweba ithuba lokudla umhlanganiso kwiNational First Division (NFD) ngempelasonto.

I-Eagles iye emdlalweni wayo noBuntu Cape Town iwafunisa okwetoho amaphuzu amathathu. Nokho lokho bekungasho ukuthi ukuthola kwabo amaphuzu amathathu kuzobenza bangene begijima esigabeni esiphezulu. Leli qembu belidinga ukuthi iMaccabi FC ilenzele ufefe njengoba ibibhekene neStellenbosch FC eKapa.

I-Eagles ibihlezi endaweni yesibili ngamaphuzu awu-53 ngemuva kwemidlalo ewu-29, kanti iStellenbosch ibiqhwakele ngamaphuzu awu-55 emdlalweni ewu-29.

IMaccabi iwenzile umsebenzi ibamba iStellenbosch ngo 0-0 ekuhambeni. Into ebisisele wukuthi i-Eagles ishaye amagoli amane bese kungangeni lutho ngakubona. Ngaleyo ndlela bebezozibekisela indawo kwelinoju.

I-Eagles iguqiswe Ubuntu ngo 1-0. Lokhu kuholele ekutheni iqede endaweni yesibili kwi-log okusho ukuthi isizodlala kweyokuhlunga.

ITshakhuma ilale endaweni yesithathu okuyenze yazitholela ithikithi elibheke kweyokuhlunga.

Ngempelasonto kuzocaca kahle ngeqembu elizodlala kweyokuhlunga esigabeni esikhulu. Amaqembu asembangweni wezembe yiMaritzburg United, Chippa United, Black Leopards, Free State Stars neBaroka FC.

Iqembu eliqede endaweni ka-15 kwi-log lizojoyina i-Eagles neTshakhuma. Kweyokuhlunga iqembu lizodlala imidlalo emine lilodwa, bese kuthi eliqede phezulu kwi-log lingene kwiPremiership.

Ukaputeni we-Eagles, uPhilani Cele, ukholwa wukuthi basangawaphendula amatafula ngokuthi badle umhlanganiso kweyokuhlunga.

“Asemakhulu amathuba okuthi sisengangena kwiPremiership. Into emqoka wukuthi senze isiqiniseko emdlalweni yasekhaya. Ngakho amathemba asekhona. Kona ngeke ngikufihle ukuthi ngidumele ngoba bengifuna amaphuzu amathathu,” kusho uCele.

Imidlalo yokuhlunga izoqala ngoLwesithathu oluzayo. I-Eagles izovula ekhaya neqembu elisuka esigabeni esikhulu.

“Umphumela esiwatholile akuwona ebesiwudinga. Silale ngemizuzu yokuqala okuyilapho abakwaze khona ukuthola igoli. Besidinga ukuthi sinqobe ngamagoli amane ukuze singene kwiPremiership. Okwenzekile sekumele sikudlulise bese sigxila ekulungiseni imidlalo yokuhlunga,” kuqhuba uCele.

Njengamanje akukacaci ngeqembu elizokwehlela kweyokuhlunga esigabeni esikhulu kodwa uCele uthe lokho akumkhathazi nakancane ngoba ulindele noma yini.

“Thina silindele noma ubani. Vele yithina esiqala ekhaya. Sizokwenza isiqiniseko sokuthi siyaqeda ngemidlalo yasekhaya,” kuphetha uCele.

Imidlalo yokuhlunga:

NgoMeyi 15: Royal Eagles v Tshakhuma

NgoMeyi 19: PD 15 v Royal Eagles

NgoMeyi 22: Tshakhuma v PD 15

NgoMeyi 25: Tshakhuma v Royal Eagles

NgoMeyi 29: Royal Eagles v PD 15

NgoJuni 1: PD 15 v Tshakhuma