Ezemidlalo

Usuthu ethubeni lokuqeda ukhondolo

Minenhle Mkhize|Published

UMQEQESHI weKaizer Chiefs u-Ernst Middendorp kumele azame ukuthola amaphuzu amathathu uma sebebhekene naMaZulu emdlalweni we-Absa Premiership eKing Zwelithini Stadium, eMlaza, kusasa ngo-7.30 ebusuku Isithombe: BACKPAGEPIX UMQEQESHI weKaizer Chiefs u-Ernst Middendorp kumele azame ukuthola amaphuzu amathathu uma sebebhekene naMaZulu emdlalweni we-Absa Premiership eKing Zwelithini Stadium, eMlaza, kusasa ngo-7.30 ebusuku Isithombe: BACKPAGEPIX

AMAZULU azozama ukuqeda ishobolo leminyaka uma esebhekene neKaizer Chiefs emdlalweni we-Absa Premiership eKing Zwelithini Stadium, eMlaza, kusasa ngo-7.30 ebusuku.

Usuthu lunerekhodi elihle kule sizini eKing Zwelithini Stadium njengoba lungakashaywa kuyona yonke imiqhudelwano.

EzikaCavin Johnson aziyazi induku eMlaza. Amaqembu afana neBaroka FC, Free State Stars, Bloemfontein Celtic neLamontville afike athola isibhaxu eMlaza kanti iMamelodi Sundowns, Orlando Pirates, Polokwane City neHighlands Park badlale ngokulingana noSuthu. ICape Town City nayo ithole isibhaxu kwiTelkom Knockout enkundleni efanayo.

Yize kunjalo kodwa Usuthu lwazi kahle ukuthi alukaze luthole iwini kuMakhosi eminyakeni engu-12 eyedlule. AmaZulu agcina ukushaya iChiefs ngo-2007.

Nokho okuphawulekayo ukuthi ngesikhathi Usuthu lushaya iChiefs ngo 2-1 ngo 2007 ngu-Ernst Middendorp owayengumqeqeshi waMakhosi. Lo mqeqeshi waseGermany usanda kubuyela eNaturena.

Usuthu luzokwethemba ukuthi luzophinde lumshaye uMiddendorp kodwa abadlali bazi kahle ukuthi ngeke kube lula. Abakayishayi iChiefs emidlalweni engu-19 yeligi.

Emidlalweni engu-20 edlule phakathi kwala maqembu AmaZulu asawine owodwa kuphela. La maqembu aseke ahlangana kule sizini eFNB Stadium, eGoli. IChiefs yawina ngo 2-0 kulowo mdlalo.

IChiefs izobe ibheke ukuwina umdlalo wesibili ibhekene naMaZulu futhi izozama ukuba yiqembu lokuqala ukushaya Usuthu eKing Zwelithini Stadium kule sizini.

Ngesizini edlule iChiefs yabuya nephuzu elilodwa eKing Zwelithini Stadium ngemuva kokuthi umdlalo uphele ngo 0-0. URhulani Manzini wageja iphenathi kulowo mdlalo.

AmaZulu awakawini kulo nyaka. Ashaywe yiPolokwane City ngo 3-2 e-Old Peter Mokaba Stadium, ePolokwane, emdlalweni wokuvula unyaka. Usuthu luphinde lwahluleka ukuwina ngesikhathi lubanjwa yiHighlands Parks ngo 0-0 ngempelasonto.

Ngakolunye uhlangothi iChiefs ayinawo umgqigqo ngaphansi kukaMiddendorp. Ishaywe yiZesco United ngo 3-1 eLevy Mwanawasa Stadium, eNdola, ngempelasonto emdlalweni weCAF Confederation Cup.

Ivule unyaka ngokushaywa yiMamelodi Sundowns ngo 2-1 emdlalweni weligi.

Wonke amehlo azobe ethe njo kuKhama Billiat no-Emiliano Tade ukuthi basize amaqembu abo. Bobabili laba badlali bashaya into ecokeme emaqenjini abo.

Ngabe Usuthu luzoluqeda ukhondolo uma selubhekene naMakhosi noma kuzoqhubeka njengokujwayelekile? Konke kuzohlaluka kusasa.