OweSafa ukhala 'ngendelelo' yeSABC

UMENGAMELI weSouth Africa Football Association (Safa), uDanny Jordaan, usibize ngenhlamba isenzo se-South African Broadcasting Corporation (SABC) sokufaka amakinati ekusakazweni kwemidlalo yeBafana Bafana neBanyana Banyana.

Abathandi bakanobhutshuzwayo kuleli sebahlanza ngedela ngendaba yokusakazwa kwebhola kwiSABC, ikakhulukazi uma kudlala amaqembu esizwe ngenxa yokwenzelwa phansi yile nhlangano.

Engxoxweni ekhethekile. uJordaan abe nayo naleli phephandaba, uphumele obala waveza isizathu esenza iSafa ingavumelani etafuleni lezingxoxo neSABC.

UJordaan uyakuvuma ukuthi abathandi bebhola yibona abagcina beshayekile ngokungasakazwa kwemidlalo, kepha uthe lesi simo singaphezulu kweSafa.

Usole iSABC ngokubathatha kancane, nokungabahloniphi njengenhlangano eyemangele unobhutshuzwayo kuleli.

“Imidlalo okulindeleke isakazwe yiSABC ngeyishumi yeBafana Bafana, eyishumi yeBanyana Banyana, imidlalo ka-Under 23, imidlalo ka-Under 20, neyamanqamu ye-ABC Motsepe League. Kuyo yonke le midlalo, iSABC ithi ifuna ukukhokha imali ewuR10 million. Uzokhumbula ukuthi besinenkontileka ne-SABC kusuka ngo-2015 kwaze kwaba wu-2017. Kuleyo nkontileka (emidlalweni efanayo), iSABC ibikhokha imali engu R110 million. Uma ubuka kahle lokhu kusho ukwehla kwemali ngendlela engamukelekile,” kuchaza lesi sikhulu. UJordaan uthe bayibuzile iSABC ukuthi yiluphi uhlelo elusebenzisile ekutheni igawule imali ngale ndlela kodwa kuze kube yimanje abayitholi impendulo.

Eqhubeka uJordaan echaza lolu daba oluyinzukayikeyi, uveze nokuthi ngesikhathi sikahulumeni wobandlululo, iSABC yayikhokha kangcono kakhulu uma kuqhathaniswa nekubeka etafuleni njengamanje. “Ngesikhathi sikahulumeni wobandlululo iSABC yayisikhokhela imali ewu R37 million. Kodwa ngemuva kweminyaka ewu-20 sikuhulumeni wentando yabantu iSABC ifuna ukusinika uR10 million. Lokhu akuzwakali nhlobo,” kusho uJordaan.

Ebuzwa ukuthi kungenzeka yini kungekudala lolu daba lube nesisombululo kwazise abathandi bebhola yibona abadonsa kanzima, uJordaan uthe, “Mhlawumbe kungalunga uma iSABC ingayeka ukusethuka ngokubeka amakinati etafuleni. Kulo mdlalo wethu neParaguay sichithe imali ewu R7 million ngawo uwodwa nje vo. Cabanga-ke uma kufanele sidlale imidlalo elinganiselwa ku-30 kodwa sikhokhelwe uR10 million, bathi thina asiyithathephi imali?"