UMasuta ujabule ngabeLeopards
UJABULE uJoel Masutha oqeqesha iBlack Leopards ngendlela abadlale ngayo bebhekene neKaizer Chiefs koweTelkom Knockout Last 16 eFNB Stadium, ngeSonto UJABULE uJoel Masutha oqeqesha iBlack Leopards ngendlela abadlale ngayo bebhekene neKaizer Chiefs koweTelkom Knockout Last 16 eFNB Stadium, ngeSonto
AKAYIKHULUMI eyokuvika izembe nabadlali bakhe umqeqeshi weBlack Leopards, uJoel Masutha.
Lo mqeqeshi uveze lokhu ngemuva kokuthi iLeopards ithwalise kanzima iKaizer Chiefs emdlalweni weTelkom Knockout Last 16 eFNB Stadium ngempelasonto.
Iqembu likaMasutha lihambe phambili emdlalweni ngegoli likaPhathutshedzo Nange esiwombeni sokuqala. Kulesi siwombe liyeke amanye amathuba okushaya amagoli, okungezinye izinto uMasutha akhale ngazo.
IChiefs ithole igoli lokulinganisa elikaHendrick Ekstein esiwombeni sesibili okuphoqe umdlalo uye esikhathini esengeziwe, wagcina kumaphenathi kwadlula Amakhosi ngo 4-2.
ILidoda Duvha ingelinye lamaqembu adlala ibhola elihle yize isaphikwa yimiphumela kwi-Absa Premiership. Lokhu ibinconywa ngakho nangesizini edlule igijima kwiNational First Division (NFD).
Kwi-log ihleli endaweni ka-12 ngamaphuzu ayisishiyagalombili emidlalweni elinganayo.
Emdlalweni olandelayo weligi izokwamukela iFree State Stars eThohoyandou Stadium ngeSonto ngo-3.30 ntambama.
“Uma ngikhuluma nabadlali bami ngokudliwa yizembe kungasho ukuthi angibethembi futhi angikholelwa kubona. Lokho sizofunda ngakho emaphepheni futhi ngeke sidlalele ukuthi sizama ukubalekela izembe. Silapha ukuzoncintisana njengawo wonke amaqembu futhi ngiyakholwa wukuthi sisenalo ithuba lokuqeda endaweni engcono.
“Akekho umuntu oseshiya kakhulu omunye ngamaphuzu futhi akekho osewine imidlalo emine kulandelana, ngakho ngiyakholwa ukuthi nathi sinalo ithuba futhi amaqembu asazothwala kanzima kithina (eThohoyandou),” kusho uMasutha.
Uthe ukholwa wukuthi useyilungisile indaba yodonga lwakhe oluvuzise amagoli awu-12 kwiligi.
“Silande uChris Katjukua obeyibambe noDjunga Munganga namuhla. Ngikholwa wukuthi amava akhe yiwona ebesiwadinga. Ngicabanga ukuthi leyo ndawo sesiyilungisile yize sisengamsayinisa omunye umdlali (wasemuva) uma kuvela ithuba ngoba isizini iseyinde.”
Mayelana nomdlalo wabo neChiefs uMasutha uthe: “Bekuwumdlalo omuhle wamaqembu amabili abezimisele ngokudlala. Ngicabanga ukuthi abalandeli bakujabulele abakubonile. Esiwombeni sokuqala sibe namathuba amathathu noma amane kodwa sangawasebenzisa, okuyikhona okusenzele phansi. Kwesesibili iChiefs icindezele kodwa sakwazi ukumelana nayo engibona kuyinto enhle, ikakhulukazi eqenjini elivela kwiNFD elifike langaba novalo.”