IPirates isanethemba lokunqoba enye yezindebe kule sizini
UMQEQESHI we-Orlando Pirates uMilutin Sredojevic ohlalele ethembeni lokuhlabana ngesicoco kule sizini UMQEQESHI we-Orlando Pirates uMilutin Sredojevic ohlalele ethembeni lokuhlabana ngesicoco kule sizini
UMQEQESHI we-Orlando Pirates, uMicho Sredojevic, ukholelwa ekutheni iqembu lakhe lisengakwazi ukuphendula amatafula ngale sizini ngokunqoba enye yezindebe yize noma lehlulekile ngezibulo lemiqhudelwano yale sizini edlalelwa amaqembu ePremier Soccer League (PSL), iMTN 8.
“Kuyona yonke imiqhudelwano esisuke sibamba iqhaza kuyona sisuke sinezinhloso ezinqala zokunqoba noma yikanjani,” kuchaza uSredojevic.
“Yiwona mehluko weqembu engibe nenhlanhla njengamanje ukuthi ngibe umqeqeshi walo.
“Siyithimba labaqeqeshi nabadlali sihlangene nokwesekelwa abaphathi nabalandeli, sisebenza ngokuzikhandla ukufeza lezo zinhloso esizifunayo.
“Ngesizini edlule besinalokhu kokuthi sizithoba amanxeba nokuthi ngalena sifuna ukwenza konke okusemandleni ukuthoba imiphefumulo.”
Umqhudelwano iTelkom Knockout uhlelwe ukuthi uqale ngo-Okthoba 20-21, ngemuva kancane kwekhefu leFIFA, uzonikeza Amabhakhaniya elinye ithuba lokuphonsa inselelo yokunqoba lendebe kule sizini.
ISea Robbers izodlalela ekhaya neChippa United nokuwumdlalo lomqeqeshi odabuka eSerbia athi uzoya kuwona ngokukhulu ukucophelela.
“Sifuna ukuyinikeza inhlonipho iChippa. Nathi ngokunjalo kuzofanele sizihloniphe nomdlalo ngokunjalo.
“Lo mdlalo uzodinga ukuthi siqwashe. Emdlalweni wendebe akufanele ucwayize nakancane ngakho sizocophelela kukhona konke okuzobe kwenzeka ukuqinisekisa ukuthi sidlulela esigabeni esilandelayo.”
USredojevic uyavuma ukuthi abagadli bakhe abakabi bukhali yize beyiqembu lokuqala kwiPSL ukuqasha uStephane Adam, onguchwepheshe ekuloleni abagadli ekutheni bakwazi ukuqobela phakathi amagoli.
Emidlalweni ewu-11 bashaye phakathi amagoli awu-14 kuphela ekubeni belahla inqwaba yoqekelele bamathuba.
Kodwa uMicho uphinde akuvume ukuthi umsebenzi owenza ekuhlaseleni kufanele ulingane nalawo wokuvala emuva.
Nakuba bebuthuntu phambili ngokunjalo nasemuva basavuza uma ubheka ukuthi sebededela amagoli awu-11 asebangenele kuze kube yimanje.
“Ebholeni uyadinga ukulinganisa indlela ohlasela ngayo naleyo osuke uvimba ngayo emuva,” kusho uSredojevic ezakhe eselokhu zagcina ngeNedbank Cup ngo 2014 ukuhlabana ngesicoco.