UMosimane usegxile kuCAF ChampionsLeague
PITSO MOSIMANE PITSO MOSIMANE
UPITSO Mosimane, opheka iMamelodi Sundowns, uthi isicoco se-Absa Premiership sesingamane sihambe nezimbangi inqobo nje uma bona bezibekisele indawo kuCAF Champions League ngonyaka ozayo.
INingizimu Afrika inezindawo ezimbili kuChampions League okungompetha beligi neqembu elizoqeda endaweni yesibili kule sizini ka-2016/2017.
ISundowns ingompetha beligi bangesizini edlule futhi iyona engompetha base-Afrika emuva kokunqoba isicoco seChampions League ngoDisemba.
Embangweni we-Absa Premiership wale sizini ihubhana neBidvest Wits ezihola phambili ngemuva kokuthi bobabili benqobe imidlalo yangempelasonto yeligi.
Emidlalweni yangeSonto iWits iguqise iMaritzburg United ngo 1-0 eBidvest Stadium ngegoli elishaywe nguPhumlani Ntshangase. ISundowns yona ithele phansi i-Orlando Pirates ngo 2-0 ngamagoli kaKhama Billiat noYannick Zakri.
Imiphumela ibeke iZitshudeni esicongweni ngamaphuzu awu-57. Zihlukaniswe amaphuzu amathathu namaBrazilians anawu-54. Womabili amaqembu asalelwe yimidlalo emithathu.
Uma iZitshudeni ziyiwina yonke imidlalo esele zizoba ngompetha be-Absa Premiership bale sizini kanti uma zingaqhuzuka zizobe zivulele ezikaMosimane intuba neCape Town City esekhona embangweni.
“Ngeke sizikhathaze ngeWits ngoba akusekho ezandleni zethu. Ukube kusasezandleni zethu besingakhathazeka ngabo,” kusho uMosimane ebuzwa kuthelevishini ngokunqoba kwabo bobabili neWits.
“Okwethu wukwenza lokhu okumele sikwenze noma ngabe asiyiwini iligi. Kufanele siwine imidlalo yethu emithathu esele, sithole indawo kuChampions League. Ngeke siwine yonke into, manje ngoDisemba kade siwina iChampions League, ngoFebhuwari siwine iSuper Cup. Uma kuyibona okumele bawine (iligi), abayiwine. Ngibafisela inhlanhla, bayayilwela.”
UMosimane esakhuluma ngeChampions League, kule mpelasonto iqembu lakhe lizoqala umkhankaso wokuvikela isicoco njengoba sekungenwe esigabeni samaqoqo kulo mqhudelwano.
ISundowns izokwamukela iSaint George yase-Ethiopia eLucas Moripe Stadium ngoMgqibelo ngo-5 ntambama.
ISuperSport United edlala kuCaf Confederation Cup inomdlalo wamaqoqo eLucas Moripe ngoLwesihlanu ngo-7 ebusuku lapho izokwamukela iqembu laseGuinea, iHoroya.
NgeSonto iPlatinum Stars izodudulana neMouloudia Club yase-Algeria eRoyal Bafokeng ngo-5 ntambama.