ONGOTI bezempilo bathi isikhathi samaholidi senza ukuthi umntwana acishe alibale yisikole. Bathi lokho kungenza kube nzima enganeni uma sekuvulwa izikole, sekumele ibuyele esikoleni.
Bathi kuba nzima ngokuphindiwe kumntwana omncane futhi osuke ezoqala ukufunda ngoba umqondo wakhe usuke ujwayele ukuhlala ekhaya adlale. zOkunye wukuthi ingane isuke ingayijwayele indawo enabantu abaningi njengesikole, okungenza kube nzima uma sekumele iyofunda.
UMnuz Murray Hewlett, oyisikhulu esiphezulu sesikhungo sezempilo esizimele i-Affinity Health, uxwayise abazali ngokuthi njengoba kuqala unyaka futhi kuvulwa izikole kuleli sonto, kulindeleke ukuthi kube nzima ezinganeni ezincane ukubuyela esikoleni ngokukhululeka nangaphandle kokukhathazeka.
“Izingane eziningi zibhekana nezimo ezahlukene ekufundeni kwazo, kanjalo nokuthi ukuguquka kwezinto nendlela yokufunda yezobuchwepheshe besimanje, kwenza abanye abantwana babe nokukhathazeka uma sekubuyelwa esikoleni. Ucwaningo lweWorld Health Organization, lwaveza ukuthi umntwana oyedwa kwabayisikhombisa, uba nenkinga yokugqilazeka emqondweni ngenxa yezimo nezinto ezenzeka esikoleni, lokho okudinga ukuthi umzali abambe iqhaza asize ukuze kungabi nzima enganen ukwamukela ukuvulwa kwezikole,” kuchaza uHewlett.
Nawa amathiphu angasetshenziswa ngumzali ukusiza ingane:
1. Yakha uhlelo lokwenza izinto ngendlela eyodwa
– Uhlelo olulodwa noluqondile lokuthi izinto nizozenza kanjani futhi ngasiphi isikhathi njengesokuvuka ekuseni, esokudla, nesokulala kungasiza ukwenza ingane isheshe ajwayele futhi ithande ukuya esikoleni.
2. Khuluma ngokukhululeka nomntwana wakho
– Ukukhuluma ngendlela ezokwenza umntwana wakho akwazi ukuvuleleka ngokumhluphayo, kungasiza ukuthi usheshe wazi uma kukhona isimo noma into emkhathazayo emoyeni, okungenza uyilungise leyo nkinga ngokushesha.
3. Ukulala ngokwanele kusemqoka
– Ukulala ngenye yezinto esimsiza kakhulu umntwana wakho ukuthi aphumuze umqondo. Ukungalali ngokwanele kungenza ukuthi umntwana wakho ahlale ekhathele, okungadala inkinga njalo uma sekuyisikhathi sokulungela ukuya esikoleni.
4. Yiba nezinkulumo ezakhayo nengane yakho
– Ukuhlale ukhuluma nomntwana wakho ngendlela ezokwenza akhuthale ukuqinisa ezintweni azithandayo nokumjabulela uma kukhona okuhle akwenzile noma akuzuzile, kungenza ukuthi akujabulele ukuya esikoleni ngoba ebona kungenye yezinto ezizomsiza ukuba nekusasa eliqhakazile.
5. Kwenikwenzayo ningakhohlwa wukuhlaba ikhefu
– Isikole siyagqilaza futhi senza umntwana akhathale, ngakho kuhle ukuthi wenze izindlela zokuthi umntwana wakho athole ithuba lokuhlaba ikhefu, angenzi lutho nje, aphumule ukuze umzimba, umqondo negazi kubuyelwe ngamandla.
6. Gwema ukugquma ingane endlini
– Ukuphumela ngaphandle iyodlala nontanga kwenza umqondo wengane ukhululeke futhi kuletha injabulo kuyona. Yingakho kusemqoka ukuthi umzali avumele ingane ukuthi ithole ithuba lokuhlangana nabangani bayo, ukuze ibe nobudlelwano nontanga bayo.
7. Funani usizo lwabaqeqeshelwe ukwelapha
– Uma kwenzeka ubona sengathi umntwana wakho uhlale ecindezelekile futhi engakhululekile, kungakusiza ukuxhumana nabeluleki bezempilo ukuzwe alashwe futhi elulekwe ngendlela efanele nezomsiza ukugwema ukhwantalala nokucindezeleka.
Umbona kanjani umntwana onenkinga nodinga usizo?
– Uba nenkinga yokungafuni ukulala futhi angakuthandi ukudla.
– Uhlale ekhala ngobuhlungu bekhanda nesisu.
– Akenzi kahle ezifundweni zakhe esikoleni.
– Akabe esafuna ukuhlangana nezinye izingane, uhlala yedwa.
“Ukusiza umntwana agweme izinkinga uma sekumele abuyele noma ayoqala esikoleni wumsebenzi odinga ukubambisana kwabazali, othisha nabaqeqeshelwe ukwelapha ngokwenqondo. Asihlale sixhumana kahle nezingane zethu nsuku zonke ukuze kube lula ukubona uma sekunenkinga,” kucebisa uHewlett.