SITHEMBISO MKHIZE
UZOKHANGISA ingqephu kwiDundee July Horse Racing, uMakhosi Ntshangase weSistas Felas egqokisa osaziwayo abanjengoZozibini Tunzi owake waba uMiss Universe, nonontandakubukwa, uSomizi Mhlongo.
Emcimbini wokwethulwa kwezinhlelo zomjaho walo nyaka, kuvele ukuthi uzoba ngoJulayi 20, eNdumeni Horse Racing Track. Bewuhanjelwe nguMphathiswa omusha woMnyango wezemiDlalo, ezoBuciko namaSiko, uMnuz Mntomuhle Khawula, ongene ngevosho eyokwethula inkulumo. Ubephelezelwa yinhloko yomnyango uDkt Thobile Sifunda, imeya kaMasipala waseNdumeni, uMnuz Siyabonga Ndlovu nezinye izicukuthwane. Kuvezwe nokuthi ingqikithi yalo nyaka ithi African Jewel.
UMakhosi obehambisana noGugu Ngema weGugu Mobile Boutique, bakhangise ngogabigabi ezethamelini, ngeminye imisiko abazogadla ngayo ngomjaho. Kusukela ezingubeni, izigqoko, amabhande, amacici konke bekugabe ngobuhlalu. UMakhosi waseGamalakhe, ePort Shepstone, osehambele amazwe awu-12 ngakho ukukhangisa ingqephu, uthe uzizwa ebusisekile ngokumenywa ukuzokhangisa emjahweni.
Uthe njengoba ingqikithi ithi African Jewel, uqome ukwenza imisiko yakhe ngemibala yefulegi lakuleli.
"Uma uyibuka ngokuvuleka komqondo ingqikithi yalo nyaka, ikhuluma ngamakhosi nezindlovukazi. Lokhu kusho ukuthi abantu bangasika ingqephu ezoncika esitayeleni sanoma iyiphi inkosi noma indlovukazi. Ngenxa yokuthi ngithanda izwe lami ngiqome ukusebenzisa imibala yefulegi lakuleli," kubeka uMakhosi onesikole ngakubo, i-Esayidi Fashion.
UGugu utshele Isolezwe ukuthi njengoba engungcweti wezobuhlalu, ubemenywe umnyango ukuzoqinisekisa ukuthi abasiki bengqephu bayayilandela yini ingqikithi yalo nyaka.
"Ngijabule ngezinga engilibone kubasiki bengqephu. Uma ngiqhathanisa naseminyakeni edlule balinyuse kakhulu izinga," kubeka uGugu othe ugqokisa neNkosazana uMeghan eshade neNkosana Harry.
Uveze ukuthi useke wanzela nomculi waseMelika, uBeyonce umgexo owenziwe ngobuhlalo. Uthe unamakhasimende eLondon, Paris, nase-Austria. Kuthengwa ngohlelo lwe-online esitolo sakhe. Bobabili abasiki bengqephu baveze ukuthi bamenyiwe ukuyokhangisa nakwiHollywoodbets Durban July, ngoMgqibelo.
UKhawula uthe izinhlelo zeDundee July zizoqala ngoJulayi 10, esifundeni imaJuba. Kuzocotshelelwa izingane ngolwazi oluphathelene nokufuya amahhasi nangobunye ubuciko. Uthe ngakusasa kuzoba nombukiso emigwaqweni yeseDundee.
Uveze nokuthi uma sekuphele imijaho ngoMgqibelo, ntambama kuzoba nedili lo mculo.
"IDundee July seyiwenyuse kakhulu umnotho waseDundee. Okusele ukuthi lo mnotho ingawenzi kanye ngonyaka kodwa kube into yansuku zonke. Sizohlala phansi sibonisane ukuthi sikufeza kanjani lokhu," kuchaza uKhawula.
Imeya uNdlovu ithe ngabe umnotho wendawo yabo usukhule kakhulu ukube banemigwaqo emihle.
"Indawo yethu iyigugu lo mlando wakuleli. Kwaliwa kuyo izimpi ezinohlonze. Ukubheda kwemigwaqo kwenza zingathuthuki ngokwanele ezokuvakasha. Sizofongqa isigqoko kuhulumeni ukuthi asilungusele yona. NeDundee July ingathanyelwa yizinkulungwane zabantu," kusonga uNdlovu.