BAKHIPHE unyawo osaziwayo izolo ebusuku, edilini lomcimbi weMzansi Magic wokwethula ngokusemthethweni umdlalo, uShaka ilembe eMontecasino, eGoli.
Umcimbi ubuhlanganisa abalingisi, izikhulu zemidlalo yethelevishini, osaziwayo bemikhakha ehlukene nabezindaba. Bonke bebegabe ngengqephu esezingeni eliphezulu.
Ongoti bezemfashini, nabezokozicwala bakhombise obukhulu ubuhlakani ngokuhlanganisa imisiko yesimanje ebixube ubuciko besintu. Bekucacela noma ngubani ukuthi ingqephu ihambisana nendikimba yezobuciko besintu. Kusukela ekhanda izicholo, ukuboshwa kwezinwele okwehlukene ngobuhlalo neziqhinywe ngezitayela zasendulo, konke bekuxoxa indaba.
"Bahle abantu nkosi yami," kuncoma u-Ethel Mackay.
"Bahle kakhulu abesifazane," kusho uJabulani McDonald.
Iningi lezithombe zabebehambele umcimbi zizungeza emakhasini ahlukene ezinkundleni zokuxhumana kanti abantu babaza izinga lobuhle bemisiko ebigqokiwe.
Lo mdlalo weMzansi Magic kulindeleke ukuthi uqale ukudlala kwiChannel 161, ngoJuni 18 ngo-8 ebusuku.
