UMNYANGO wezokuVakasha kuleli uthi konke kumi ngomumo ngombukiso omkhulukazi wamabhizinisi ezokuvaka ezwenikazi lase-Afrika, i-Africa Travel ndaba (ATI) ngenyanga ezayo.
Lo mbukiso othatha izinsuku ezintathu kusukela ngomhlaMeyi 13 kuya ku-15, 2025, uqala ngohlelo olwaziwe nge-Business Opportunity Networking Day (BONDay) ngoMeyi 12, lapho osomabhizinisi abahlukene behlangana ndawonye ukwazana kangcono ngaphambi kokuthi kuqale imibukiso e-ICC, eThekwini.
NgoLwesithathu, kuhlangane ndawonye ababamba iqhaza embonini yezokuvakasha, osomabhizinisi abancane nabakhulu, abezindaba nezinhlaka ezahlukene zikahulumeni ezibambe iqhaza kule mboni, enkundleni iMoses Mabhida, lapho uNgqongqoshe wezokuVakasha, uNksz uPatricia de Lille, eqhakambise iqhaza elikhulayo lalo mcimbi ekuthuthukiseni umnotho okubandakanya wonke umuntu, ukusungula izinto ezintsha nokusebenzisana kwezifunda.
Indikimba yalo nyaka, ethi, “I-Afrika Engenamkhawulo,” ibeka izwekazi njengendawo yokufinyelela nezifiso ezingenamkhawulo.
Umcimbi uzophinde unikeze abathengi ithuba elilodwa lokuzitholela imikhiqizo ehlukahlukene yezokuvakasha nolwazi oluvela ezwenikazi lonke. Njengoba kunabakhangisi abangaphezu kwa-1,200 abavela emazweni awu-26 ase-Afrika nabathengi bamazwe ngamazwe abangu-908 abahloliwe abamele izimakethe zomhlaba wonke ezingu-55. Iningi labo selihlele imihlangano engaphezu kuka-7,430 eqinisekisiwe yokuxhumana kosomabhizinisi abahlukene.
Enkulumweni yakhe yosuku, u-De Lille uchaze i-ATI ngokuthi: "Akuwona nje umbukiso wezohwebo - iyinkundla yokubumba kabusha izindaba ezixoxwayo, ukwakha ukuxhumana okunamandla nokuvula ukubaluleka kokwaba amagugu alo lonke izwekazi lethu."
Ungqongqoshe uveze ukuthi nakulo nyaka kukhona osomabhizinisi abangu-120 abasafufusa abathole ithuba eliyingqayizivele lokukhangisa imisebenzi yabo kulo mbukiso.
"Leli thuba lizosiza kakhulu osomabhizinisi ukuthi bakwazi ukuxhumana nabathengi bakwamanye amazwe, bakhe ubudlelwano obusha futhi bahehe izivakashi ngemikhiqizo yabo ekhethekile."
UDe Lille ubuye wazwakalisa injabulo yakhe ngokuthi lo mcimbi wandulela ukwethulwa komkhankaso omkhulu wezokuvakasha osatshalaliswe umhlaba wonke othi, "INingizimu Afrika Ilindile - Woza Uthole Injabulo Yakho! Umgubho oqhakambisa ubuhle bezwe, ukuqhakaza kwamasiko namagugu."
"Umgomo wethu ukuqinisekisa ukuthi zonke izivakashi ziyeza ukuze zithole injabulo yazo kulo lonke elaseNingizimu Afrika futhi zivumbulule zonke izinhlobonhlobo zezinhlelo kwezokuvakasha esinazo namagugu ethu afihlwe kuwo wonke amadolobha amancane nasemalokishini."
