UMLINGISI uPhuti Khomo, usenxuse abakuleli ukuthi bayibuke nezithandwa zabo kanjalo nabangani isizini yesibili yomdlalo i-Entangled, isizini yesibili eqala ngenyanga ezayo.
Kuwona kuzogqama ubuso babalingisi abasha okukhona kubo uSisanda Henna, esisanda kubika ngaye ukuthi uzobe elingisa indawo ephambili emdlalweni wakwaM-Net, iDevil's Peak.
USisanda uzobonakala elingisa indawo kaSizwe kulo mdlalo okuzoqala isizini yawo yesibili ngoNovemba 2, ngo-8.30 ebusuku ku-1Magic (103).
Kuwona uzobe evala isikhala sikaVuyo Ngcukana kanti omunye wabalingisi abasha nguSolomon Sebothoma.
UPhuti enkundleni yokuxhumana u-Instagram, uveze injabulo yakhe ngokubuya kwalo mdlalo nanokuba yingxenye yawo kwisizini yesibili.
“Ningalinge lo mdlalo niwubuke nemindeni yenu, abazali ngiyanxusa, kanjalo nezingane zingabi khona uma niwujabulela. Abayibuka isizini yokuqala bayazi ukuthi ngikhuluma ngani,” kusho uPhuti ngamafuphi.
U-Irvin Pooe wakwaM-Net uveze ukuthi kulo mdlalo iningi labalingisi okukhona kubo uVuyo Dabula, Senzo Radebe olingisa indawo kaReggie, usomahlaya uMpho Popps (Zweli) noDidie Makobane(Zenani), bashaya ibuya.
“Lo mdlalo ugxile kakhulu entokazini uSharon (Phuti Khomo), oneminyaka eko-30, nosemkhakheni wamabhizinisi futhi owenza kahle empilweni kodwa ezothando yizona ezingahambi kahle ngenxa yokuthi esethole owesilisa athandana naye, wavele wadibana nesoka lakhe lakudala uSizwe ayesemlibele.
“Manje uSizwe naye unomuntu athandana naye kodwa lapho ehlangana khona noSharon, kuvuka okwakudala nokuyisimo esingelula, okuyisona esidala umsindo empilweni yabo nesenza lo mdlalo une nesasasa uma uwubuka,” kusho u-Irvin.
Uthe lo mdlalo awubheki nje ubungozi uthando olungakufaka kubo kodwa ababhali bawo baphinde babheka ukuthi intsha eneminyaka eko-30, ibhekana kanjani nezinkinga ezahlukene zempilo.