UMCULI wowokholo waseNanda, uNdumiso Zungu, ungomunye wezihlabani zakuleli ezizobe zishiyelana inkundla nengwazi yaphesheya kwezilwandle, uHezekiah Walker, kwiRepleshment Concert eSupersport Park, eCenturion, ePitoli ngoSepthemba 27.
UNdumiso (11), ozobe ecula ngokuhlanganyela noyise uThinah Zungu, waqopha umlando ngokuba wumculi wokuqala osemncane ukuqokwa kumaCrown Gospel Music Awards, emuva kokukhipha umucu osihloko sithi, Akasoze Akulahle ngo-2023, eneminyaka eyisishiyagalombili.
Indlela anekhono ngayo ubukeka ehamba ezinyathelweni zabanye abaculi abaqale bebancane ukushisa izikhotha, abanjengoMichael Jackson, Ricardo, Mzambiya, Msawawa, Lil Bow Wow nabanye. Useke wathola ithuba lokucula ngokuhlanganyela noyise kwiSpirit of Praise 10, engomeni ethi UJesu Ungenak'qala. Ubuye wacula noyise kwethi You Can Ask Anything nethi Ingoma. Useke washiya izithameli zisahalela impinda kumaCrown Gospel Music Awards, ehambisana noMuzi Zimu.
KwiRepleshment Concert, uNdumiso uzobuye asine adedelane noXolly Mncwango, Benjamin Dube, Dumi Mkokstad, Jumbo, Sbu Noah, Winnie Mashaba, Nontokozo Mkhize, Zaza Mokhethi, Mpumi Mtsweni, Takkie Ndou, Elle Tisane, Keke Phoofolo, Sipho Ngwenya nabanye.
Umgqugquzeli walo mcimbi waminyaka yonke uThabo "Tbo Touch" Molefe weMetro FM, uthe amathikithi alo mcimbi ahambisa okwamagwinya ashisayo.
Uthe abaculi bakuleli bazothola ithuba lokuxhumana noHezekiah kulo mcimbi. Uthe izithameli azifike ngobuningi bazo ukuze zivuseleleke emoyeni.
