INTOKAZI yaKwaMduku, eHluhluwe, uLwandile "Leah Ndlunkulu" Mtshali, izobe inandisa nezingqungqulu kwiZiyakhala Mo Sun City Festival, eSun City Superbowl,eNorth West ngoJuni 28 kusukela ngo-4 ntambama.
ULwah Ndlunkulu uzobe esina ededelana nompetha bamaGrammy Awards iLaysmith Black Mambazo, Ringo Madlingozi, Nothembi Mkhwebane, Sjava, King Monada, Cassper Nyovest, Makhadzi, Ntate Stunna, General Muzka, Mthandeni SK, Maqhinga noQadasi nabanye. Kule ndumezulu izithameli kulindeleke ukuba zitheleke ziswenke ngemvunulo yezizwe ezihlukahlukene zizogubha umculo namasiko ezizwe ngezizwe.
Oyimenenja jikelele yemisakazo engaphansi kweSABC, uThinasiphelele Sixaso uthe ukubambisana kwalesi sikhondlakhondla nabeSun City kuzokwenza amazwi ahlukahlukene emkhakheni wezokungcebeleka athole ithuba lokukhuluma nemakethe yawo.
"Aphinde abelane ngomculo namasiko nabalandeli bawo."
USixaso uthe vele bona bewuSABC basekhaleni ekuqhakanjisweni kwamasiko nomculo oyigugu kuleli.OyiNhloko yokugqugquzelwa kwemicimbi, eSun City, uNombuso Buthelezi, uthe bajabule kakhulu ngokubambisana neSABC ngoba bakwazi ukufinyelela kuwowonke amagumbi akuleli nakubathandi bomculo wesintu. Amathikithi okuthamela lo mcimbi atholakala eTicketPro ngoR350 kanti awezicukuthwane abiza uR1500.
