UZOZWAKALA emsakazweni iVuma FM, esakaza uhlelo lwantambama phakathi nezinsuku uBongani Mtolo, Isolezwe elithole ukuthi useyingxenye yalo msakazo.
UBongani ozakhele igama emisakazweni efana ne-East Coast Radio neRadio 2000, kuvele ukuthi ungene esikhaleni sikaLekomotion okhonjwa kolwasebusuku obelusakazwa uLinda “The Game” Ndimande.
Akucaci ukuthi yini edale ukuthi uLinda akhishwe kulo msakazo njengoba esevalelisile ngisho kubalandeli bakhe ezinkundleni zokuxhumana.
Umthombo weSolezwe uthe okwamanje kusadida ukushiya kukaThe Game isigubhukane kulo msakazo.
“ULeko akahambi kodwa uzoya ohlelweni lwasebusuku. Akucaci kahle ukuthi kwenzekeni ukuze uLinda ahambe. Asazi noma ukuvuma kukaBongani ukuba yingxenye yalo msakazo yikhona okuholele ekutheni abaphathi babone ukuthi kungcono kube khona umsakazi abamdedelayo ukuze bazuze uBongani. Kodwa ngisho ezinkundleni zokuxhumana akukho uThe Game akuvezile okungagqamisa ukuthi uhambe kabi, ubonge abalandeli bakhe washo ukuthi isazohlangana kuwona umkhakha wezokusakaza,” kuchaza umthombo.
Uveze ukuthi uBongani uzoqala kulo msakazo njengoba kuqala u-Agasti.
Okhulumela iVuma FM, uVusi Shangase uthe njengomsakazo bazokhipha isitatimende esichaza ngezinguquko ezizokwenzeka kulo msakazo maduzane.