UBIG Zulu ugxeka omaskanda, athi bahlaza umkhakha womculo ngomkhuba wabo wokunandisa ngaphandle kokusebenzisa umbhobho nesigingci esiteji.
Kusabalale ividiyo kaBig Zulu ezinkundleni zokuxhumanalapho ezwakala ekhononda ngabaculi bakamaskanda, emcimbini weGcwalisa Picnic All White obungoMgqibelo odlule, eKing's Park, eThekwini.
Uthe kuyamdumaza ukubona omaskanda benandisa esiteji ngaphandle kokuxhuma isigingci nombhobho uma becula bukhoma.
Ethintwa uthe akagxeki umcimbi kaKhuzani Mpungose, okunguye obengumhleli weGcwalisa Picnic All White, wathi ukhala ngomkhuba womaskanda obukeka usuwanda.
"Sikhule ngawo umaskandi, manje kubuhlungu ukubona abaculi belingisa esiteji okumele engabe banandisa bukhoma kuso. Lento abahlale beyenza ibizwa ngokulingisa. Ungacula kanjani phambi kwezihlwele esiteji ungawuphethe umbhobho nesigingci ekubeni ungumaskanda?" kubuza uBig Zulu.
Eqhuba, uthe kumele bahloniswe abalandeli abasuke bekhokhe imali yabo ngenhloso yokuyobuka omaskanda abazifelayo ngabo, benandisa bukhoma. Wathi lo mkhuba yinto ahlale eyibuka yenzeka emcimbini hlukene futhi uyihlazo elithunaza isithunzi sabaculi bakuleli.