UZITHINTELE iziqandu umlandeli kaZandie Khumalo oncofe uKelly Khumalo, ngokukhulelwa ingane yesithathu.
UMbongi Timm ubhale ukuthi "Uzala njalo nawe. Yini ungaphuzi amaphilisi abizwa ngama-morning after?"
Kube uzithintele uMbongi kubalandeli bakaZandie kwi-Instagram. Kuqale uThokozani Miya, wabuza uMbongi ukuthi uwuyise kabani. Kube sekulandela uNokuh obuze ukuthi uMbongi nguye yini owondla izingane zikaKelly, noma omcuphise kwakhe?
"Nithanda uchuku." UVuvu Kani uthe umuntu osezingeni likaKelly ubengeke akhulelwe bese eyigcina ingane, ngaphandle uma efuna. "Ungenaphi-ke wena ngoba uyakwazi ukuzondla."
Lokhu kwenzeke emuva kokuba uKelly ekuqinisekisile ukuthi usezithwele, efaka isithombe sakhe egqoke ingubo esiveza kahle isisu sakhe.
Nakuba kunjalo, iningi losaziwayo limhalalisele uKelly ngokukhulelwa. Kosaziwayo kubalwa uDJ Happy Gal, Somizi Mhlongo, Lady Du, Manaka Ranaka, Winnie Ntshaba, Basetsana Kumalo, Nhlanhla Mafu, Winnie Ntshaba noCandy Tsamandebele.
Izindaba zokukhulelwa kukaKelly ziqale ukusabalala emuva kokubonakala kwezithombe zakhe ekhasini le-Instagram enandisa emcimbini obuseBergville nobuseLimpopo. Isolezwe laphakathi nezinsuku lithole ngomthombo walo ongashayi eceleni ukuthi lo mculi ukhuleliswe ngowayengumdlali weKaizer Chiefs, uMthokozisi Yende. UKelly unezingane ezimbili, okunguChristian amthola kumrepha, uJub Jub wodumo lwe-Uyajola 9/9, uThingo wamkhuleliswa ngowayengunozinti we-Orlando Pirates neBafana Bafana ongasekho, uSenzo Meyiwa. Kwenzeka lokhu nje icala lokubulawa kukaMeyiwa lisahlehliselwe unyaka ozayo eNkantolo eNkulu yasePretoria.