USABONGA ngokukhethekile umpetha wesibhakela ohambe phambili izolo “empini yabaphansi” ebibhekwe ngabomvu eNingizimu Afrika.
USimphiwe The Beast Sbali Mlambo izolo unqobe impi ebiyethiwe ngokuthi iThe Battle of Abaphansi ebeqhathwe kuyo noThabo The Terrible Mabhodoko, nokuyimpi ebisakazwa ezinkundleni zokuxhumana.
Abantu bese bekade bayilindela kuleli njengoba beyikhangiswa emaphephandabeni, kwithelevishini, emsakazweni nasezinkundleni zokuxhumana.
USbali uyena ogcine enqobe lempi ehlula uThabo izolo ebusuku yize wake wangenwa amanzi emadolweni nokwakulahlisa ithemba kubalandeli. Indlela ajabule ngayo uthe ubonga ukwesekwa ebekuthola kubantu bakuleli futhi usazoqopha ivideo ezibongele yena bambone ukuthi ujabule kangakanani.
Abantu abaningi selokhu uSbali enqobe lempi abawuvali umlomo ezinkundleni zokuxhumana.
"Bantu bakithi eNingizimu Afrika nkosi yami ngenkulu intobeko nenhlonipho ngithanda ukubonga ngokungeseka eninginika kona. Ngiyabonga kakhulu ngisazoyifaka nevideo yokubonga," kusho uSbali.
Lempi seyivele yamakhela olukhulu udumo ezinkundleni zokuxhumana njengoba nabalandeli bakhe bebonakala bekhula mihla namalanga nokubalwa abekhasi lakhe likaFacebook.