ISILOMO somsakazi nomethuli wezinhlelo esiphinde sibe nguDJ siveza ukuthi sichithe esinye seziteshi ezinkulu zokusakaza KwaZulu-Natal ebesiseshela.
UMacGyver Mukwevho odume ngelikaMacG kulandela nohlelo iPodcast and Chill uthe ngesonto eledlule uchithe iGagasi FM limthembisa uhlelo.
"IGagasi FM langithembisa uhlelo ngesonto eledlule ngathi cima cima," kusho uMacG.
Akagcinanga lapho uveze ukuthi akazange elokhu ebalibazisa ngoba ngokwakhe akasaziboni eqashwa njengomsakazi nomsebenzi.
"Uma ngibuyela emsakazweni manje angisafuni iholo kodwa ngifuna ukuba yingxenye yebhizinisi," kusho uMacG.
Ukuba umsakazi osezingeni eliphezulu nohola kangcono kuvelile ukuthi uMacG akakuqali manje njengoba wayehola imali engcono ngisho esafika emsakazweni.
Ngo-2008 wayesevele ehola imali ebhekile kwiYFM lapho aqala khona ukuveza ikhono lakhe lezokusakaza.
"Ngaqala emsakazweni ngangisebenza ngempelasonto ngingena ngo-3 kuya ku-6 ezintatha njalo ngoMgqibelo nangeSonto ngihola u-R6000. Kimi kwakukahle ngingenayo inkinga," kusho uMacG.
Lokhu kusho ukuthi ngenyanga wayegcina esakaze izinhlelo eziwu-8, esakaza amahora amathathu kuphela ngosuku ngokohlelo ayelethula.
Ngaleli holo uveze ukuthi wayekwazi ukumelana nezindleko zomoto ephambili iMini Cooper ayehamba ngayo ngalesi sikhathi.
Ukubalulile ukuthi wayehlala nonina ngakho wayengaqashile ngalezi zikhathi, nokuyinto elimaza abasakazi abaningi ukuqasha izindawo eziseduze nomsakazo.
Ukushintsha uhlelo esengena ebusuku nsuku zonke emsakazweni kwamnyusela iholo laba u-R12 000, kwaphinde kwanyuka izimendlela wangena emini wahola u-R15 000.
Yize kunjalo kodwa kwakuvele sekukhona izinkakha eziwo-DJ Sbu aveze ukuthi wayekhokhelwa u-R100 000 ngenkampani yakhe eyayinabanye abasebenza ngaphansi kwayo.
Ngesikhathi esesebenza e-947 ukhumbula ukuthi waxoshwa esehola u-R30 000 ngoba wayesakaza ekuseni ngoMsombuluko kuya kuLwesihlanu, aphinde angene ngoMgqibelo phakathi kwamabili.
Uzakwabo uSol naye uveze ukuthi wake wenza uhlelo lwasekuseni ngokubambisana nomunye uzakwabo emsakazweni kodwa ehola u-R5 500, nokwamcoba amathambo ngoba wayezitshela ukuthi iholo elizoshintsha impilo yakhe.