UMCULI osafufusa waseNanda kodwa osedume umhlaba wonke emuva kokusetshenziswa kwephimbo lakhe engomeni kaChris Brown ethi Shooter, uNaledi Aphiwe Myongwana, uqokwe nezihlabani zakuleli emqhudelwaneni wezindondo.
Yize uNaledi Aphiwe (17) engekho emnxeni owodwa nezihlabani kuma-2023 Briefly News Entertainment Awards kodwa uboshelwe noBlack Coffee, Zakes Bantwini, Nasty C, Tyla, Sanah Mchunu, Deli Malinga, Sindi Dlathu, Dawn Thandeka King, Naymaps, Melusi Mbele, Sdumo Mtshali, Wiseman Mtshali nabanye.
Lo mfundi ophasele uGrade 12 eKhethokuhle High, uqokwe emkhakheni lapho eqhathwe khona nomsakazi weGagasi FM, uPenny Ntuli, Khethokuhle “Kay Yarms” Ngonyama noPrince “PD Jokes” Dube.
Uthe akakholwa wukuthi nguye lo osekleliswa nosaziwayo abahamba phambili kuleli nasemhlabeni jikelele.
Kwenzeka lokhu nje uNaledi Aphiwe uzobe egubha usuku lwakhe lokuzalwa eLeon’s Lifestyle Lounge, eNanda Newtown A eThekwini ngoMgqibelo, lapho ezobe eshiyelana khona inkundla noBello noGallo, Musiholiq, Mfana Kagogo, Thusheleni weMbewu, Bobo Ntombo, Chicken wakwaNjomane nabanye.
NgeSonto, uNaledi Aphiwe uzobe eshiyelana inkundla nezinye izihlabani kwiNanda Dam Music Festival, eMnsinsi Resort, okubalwa kuzo uCuloe De Song, DJ Vetkoek vs Mahoota, DJ Tira, Thebe, Mordah, DJ Sox, Jumbo, Duncan, Zakwe, DJ Kotini, Dladla Mshunqisi, 2 Faced nabanye abaningi.
NgoLwesihlanu oluzayo, le ntokazi izobe ikwiDurban Social Media Picnic, eKing’s Park Stadium (Berea Rovers), eThekwini, lapho izobe isina idedelana khona noBabes Wodumo, MacG, Sol Phenduka,Chicken noMama Wakhe, Gogo Skhotheni, Simphiwe Shembe, Khuzani, SbuNoah, DJ Merlon, MaDlamini, DJ Sox, Zakwe, Duncan, umethuli weNiyathembana Na?, nabanye abaningi.
UNaledi Aphiwe, owabonwa nguChris Brown ecula ingoma kaBig Zulu ethi Ubaba Ulala Nami, usanda kukhipha ingoma apike kuyo uNomfundo Moh ethi Uyangijabulisa nethi Zojiki Izinto, okuboshelwe kuyo uFezeka Dlamini.