AMATHE abuyele kwasifuba kubalandeli bomlingisi we-Generations:The Legacy, uZazi Kunene, ngesikhathi ehoxisa ukukhipha umucu obusulindelwe ngamehlo abomvu.
Le ntokazi, elingisa indawo ka-Alice kulo mdlalo owuchungechunge futhi osakazwa kwi-SABC1 phakathi nezinsuku ngo-8 ebusuku, bekulindele ukuba ikhiphe ingoma yayo yokuqala esihloko sithi Ungowami ngoLwesihlanu.
Esitatimendeni uZazi (25), odabuka eMgungundlovu, uxolise kakhulu ngalobu buhixihixi athi budalwe izingqinamba abahlangabezane nazo nethimba asebenzisana nalo.
"Sibe sesithatha isinqumo sokuthi sibuye siyikhiphe ngolunye usuku (athe basazolumemezela)."
Nakuba kunjalo unxuse akade sebeyilindele ngabomvu le ngoma ukuba bangawachithi amanzi njengoba ebafihlele induku emqubeni.
"Nginganiqinisekisa ukuthi kunezinto ezinkulu ezizayo."
UZazi uqale ukuzakhela ugazi kulo mkhakha ngendawo ayeyilingisa emdlalweni wethelevishini owawuthi Emlanjeni. Wabe esedlulela kobukhonjiswa kwi-Netflix othi Jiva lapho abedlala khona indawo kaNolwazi.
Abaningi bachazeke kakhulu eselingisa indawo kaSindi kwi-Smoke and Mirrors. Ngaphandle kwale midlalo, ubuye alingise indawo kaNomcoba kwiShaka Ilembe.
Khonamanjalo, lo mlingisi usanda kucacisa ukuthi yena nozakwabo, uVusi Kunene, abazalani kodwa bangosibongo fana kanjalo noNhlanhla Kunene olingisa kwi-Adulting emuva kokusabalala kwamahlebezi okuthi uyindodakazi yalaba balingisi.
