UQALE unyaka ngezindaba ezingezinhle umculi waseThekwini kulandela ukushona kukagogo wakhe obesondelene naye kakhulu.
USnenhlanhla Sneziey Msomi owaduma kuma Idols SA, uveze ukuthi ugogo wakhe akasekho emhlabeni. Ufake umbhalo nesithombe ebonakala ebambe ugogo wakhe uNkk Fikile Msomi (63) kubukeka sengathi ingesikhathi elele esibhedlela.
USneziey uthe ugogo wakhe ubenenkinga kashukela obungasalawuleki.
Ebhala emakhasini akhe ezinkundleni zokuxhumana uveze ukuthi uzobambelela emkhulekweni njengoba kade benza nogogo wakhe esaphila.
"Kodwa sthandwa sami wangishiya, impela unguJehova othembekile. Ngizobambelela emagameni omthandazo wethu wokugcina. Ngizohlale ngikuthanda," kusho uSneziey.
Kuzokhumbuleka ukuthi nangesikhathi ephezu komkhankaso wama-Idols SA, lo mculi wakubeka kwacaca ukuthi konke anakho yingenxa kagogo wakhe.
Ukushona kukagogo kaSneziey kuthinte izinhliziyo zabantu abaningi njengoba bebazi ukuthi basondelene kangakanani. Amazwi enduduzo nemiyalezo eyakhayo bekulokhu kungene njalo emakhasini alo mculi ezinkundleni zokuxhumana ezahlukene okubalwa uFacebook no-Instagram.