LUSHAYA ibuya uhlelo lwemishado kuMzansi Magic i-Our Perfect Wedding esizokhonjiswa ngoMgqibelo kulesi siteshi.
Lolu hlelo luzokwethulwa uNonkanyiso “LaConco” Chonco, Khaya Dladla noSwankie Mafoko.
Uhlelo lapho intsha ithungatha khona uthando iDate My Family, nayo izoshaya ibuya nesizini entsha ka-11.
ULa Chonco uke walumana indlebe neSolezwe NgeMpelasonto emcimbini Igcwalisa Spring Picnic lapho aveze khona ukuthi ujabule ngokubuya kwalolu hlelo, njengoba lufeza amaphupho abaningi.
“Lo nyaka ube muhle kakhulu kimina ngakho ngijabule ukuthi ngila ngikhona manje emkhakheni wokwethula izinhlelo. Akuyona into encane ukubonakala ezinhlelweni ezimbili esiteshini esisodwa, ngakho ngiyathemba ukuthi abantu bazojabula ukubona lolu hlelo lubuya futhi kwithelevishini, babuke abantu bebopha ifindo lomshado,” kusho yena.
Uthe nangonyaka ozayo yize engeke aze aveze ukuthi yini ayenzayo manje, kodwa uzoqhubeka abonakale ethula izinhlelo ezehlukene.
UShirley Adonisi obhekele izinhlelo zakuleli kwiM-Net uthe isizini yeDate My Family, izobe igcwele amahlaya futhi akangabazi ukuthi abantu bazoyithakasela.
“Abethuli balolu hlelo nje yibona esigabe ngabo, ukushintshana kwabo nje isonto nesonto kuzoba into enhle kakhulu, nezoheha ababukeli,” kuchaza yena.
Uthe njalo ngoMgqibelo okunye abantu abazokuthakasela ukubona amafilimu akuleli okukhona kuwo ethi Ubuhle Bendalo, Ukukhetha, Mashaya Othando namanye.