ABATHANDI bomculo weHip-Hop bazolibhekisa eHollywoodbets Greyville Racecourse kulo Mgqibelo beyozibonela izihlabani zabaculi ezizonandisa kwiYouth Hip Hop Festival (YHHF).
Kulaba baculi kubalwa uNasty C, Blxckie, KO, Emtee, AKA, Dream Team, OkMalumKoolKat noShouldbeyuang.
AbeRichie R Concepts okungabahleli balo mcimbi bathembisa into yamehlo kanti bakuqinisekisile ukuthi konke sekumi ngomumo futhi abaculi abathenjisiwe bazofika bonke.
"Abazohambela umcimbi wakulo nyaka ngeke bazisole ngoba kuzobe kufana nokuthi bakweminye yemicimbi yaphesheya kwezilwandle. Ukuwubuyisa bekungezinye zezindlela zokukhombisa ukuthi umculo weHip-Hop awufile neze,” kusho uHlubi Radebe weRichie R Concepts.
Uthe kuzokhumbuleka ukuthi eminyakeni edlule iYHHF yaqopha umlando iletha uRick Ross ezweni lase-Afrika ngenhloso yokuhlanganisa abaculi beHip-Hop bakuleli nabase-USA.
Uhlelo luzobe luphethwe uT-bo Touch weMetro FM nabanye osaziwayo balolu hlobo lomculo.
Phakathi koDJ abalindelekile kubalwa u-Asante, Stanky DJ, Junior De Rocka, DJ Feel, Junior B, Obby, Meech, noWobbly.
Amasango azovulwa ngo-12 emini yize abaculi abahlukene bezobe beqale ngo-7 ekuseni ngawo uMgqibelo, ukuzilolonga.
Kuvele ukuthi kungase kwenzeke kuthushuke inkakha yeHip-Hop ebingabalulwanga ezikhangisweni inandise ngosuku lomcimbi.