Isilomo somculi uVusi Nova sithi bese kuphele cishe iminyaka emihlanu sincengwa ngokwenza uhlelo olukhombisa ngempilo yaso.
UVusi, wodumo lwezingoma okubalwa kuzo iNdikuthandile, Thandiwe nezinye, uzoba nohlelo i-Unprovoked.
Lolu hlelo osekunesikhashana kubikezelwa ukuthi lusendleleni, luqinisekisiwe kuleli sonto ngesikhangiso ukuthi luzoqala ngo-8 ebusuku, ngoMashi 2, kuSABC 1.
Kulindeleke ukuthi luveze impilo ephilwa yilo mculi futhi nomngani wakhe uSomizi Mhlongo uzobe ekhona.
Ekhuluma naleli phephandaba, uthe ungumuntu ongathandi ukuveza impilo yakhe esidlangaleni.
“Ngeke uzwe lutho ngami ngaphandle komculo wami. Abantu bebefuna ukwazi ngempilo yami. Sekukudala bengicela eSABC, Showmax nakoMzansi Magic ukuthi ngenze uhlelo. Cishe yiminyaka emihlanu manje,” kuchaza uVusi.
“Bengingafuni ngoba mina angithandi ukuveza impilo yami ngaze ngagcina ngikhethe ukuthi nginike abantu abakufunayo.”
UVusi, ophume isibili emncintiswaneni iClash of the Choirs, uveze ukuthi uhlelo lwempilo yakhe akuyona into ayiphethe emgodleni wakhe kodwa kuningi okuzojabulisa abandeli bakhe.
“Sizoba nonyaka omnandi, ngijabule kakhulu,” kusho yena.
Uthe ngoFebhuwari 16 uzokhipha i-albhamu yakhe entsha iFull Circle.
Kuzoba yi-albhamu yakhe yokuqala esezimele ngemuva kokushiya iMuthaland Entertainment ahlale kuyo iminyaka.
Usegxile esitebeleni sakhe iNova Sounds asayine kuyo uKwanda ne-047.
“Kuzoba wunyaka omuhle impela ngoba nabaculi bami bazokhipha izingoma zabo. Ngijabule.”