OWAYENGUMSAKAZI woKhozi FM nomlingisi weGenerations, uZamaswazi "Swazi" Ngcobo, ugonyuluka ngokumenza ahlale enothuthuva ohlelweni lwethelevishini iReal Housewives of Durban.
Le ntokazi edabuka eShowe ithe akusiyo impilo yayo lena ebonwa ngabantu kulolu hlelo olusakazwa masonto onke kwiShowmax.
"Lolu uhlelo lumayelana nokwenzeka empilweni, ngakho yonke into yenziwa ngenhloso yokuba ihehe ababukeli futhi ezinye izinto zenziwa zibe nkulu kunalokho eziyikho."
Njengomuntu onenkampani ekhiqiza izinhlelo zethelevishini, uZama uyakuqonda ukuthi ezinye izindaba ziyakhandwa, ikakhulukazi ohlelweni lapho kudingeka khona abantu ukuba bakhulume. Akekho umuntu othanda unkosikazi okhohlekayo kulolu hlelo ngenxa yokuthi akaqhamuki nento esuke izokhulumisa ababukeli ezinkundleni zokuxhumana.
"Uma abantu bengakhulumi ngathi, lokho kusho ukuthi asenzi umsebenzi omuhle ohlelweni oluthandwa kakhulu ngabantu."
Uthe uma isizini akuyo seyifinyelele emaphethelweni abantu ngeke besayibona lempilo enokushisa ayiphila kulolu hlelo.
Kulolu hlelo ufike wagejana ngenkulumo nozakwabo u-Angel Ndlela ngokumbiza ngengane kanye no-Ameigh Thompson athi kuye usenga ezimithiyo uma ethi wadunwa imoto.
Yize esho kanje, uZama wake wakususa ukushisa oKhozini ngesikhathi esasakaza uhlelo lodado. Abalaleli babekhala ngokuthi wayengafuni omuntuza ababefona kulolu hlelo ukuba bambize ngo-anti ekubeni abasakazi ababengaphambi kwakhe nabafike emuva kwakhe babengenankinga nancu ukuba ojahidada bambize ngo-anti.
Ngaphandle koKhozi neGenerations lapho ayenguThabitha khona, uZama ubuye walingisa kwiSithembiso, Ayeye:Stripped neRoomies futhi wabuye wethula uhlelo lweTV, iLeading Citizen.