IZETHEMBISO zabadlali beMamelodi Sundowns nabeSuperSport United zikhomba ukuthi iTshwane Derby yokuqala yeBetway Premiership ngeke ishode ngeminyakazo ezoshiya abalandeli bengawuvali umlomo.
Lokhu kuqapheleke enkulumweni, ka-Aubrey Modiba, weSundowns noSiphesihle Ndlovu, weSuperSport ngaphambi kowanamuhla weligi ngo-7.30 ebusuku eLoftus Versveld.
UModiba obekhuluma nethimba leSundowns labezindaba ubalule ukuba lukhuni kwalo mdlalo ngenxa yokwazana kwabadlali nanokuthi owokuqala wesizini.
“Kuhlale kunzima ukubhekana neSuperSport ngoba singomakhelwane futhi kithina akekho ovuma kalula ukushaywa omunye,” kusho uModiba.
“Okumnandi ngalo mdlalo ukuthi indaba yamagoli ayingatshazwa uma uzobheka umlando. Ukuthi iSuperSport kade ihleli ingadlali akusona isizathu sokuthi kufanele siyithathe kancane ngoba nakithina kuzobe kuwumdlalo wokuqala wesizini,” kusho uModiba.
Ngempelasonto iSundowns idlale neMbabane Swallows koweCaf Champions League, yanqoba ngo 4-0.
UNdlovu obefakana imilomo nethimba labezindaba leqembu lakhe ukhale ngokuxhugela kwabo.
“Nakuba sixhugela kodwa lokho ngeke sicashe ngakho ngoba sibhekene neqembu okuzothi uma lisishayile kuphoqe ukulibuka libhiyoza phambi kwethu,” kusho yena.
“Umlando ukhomba ukuthi amagoli ngeke ashode ngakho-ke lokhu ngikubona njengethuba lokuqoqa izibalo ezizongenza ngikhululeke ekupheleni kwesizini ngokuhlohlwa kwamagoli nokwakhiwa kwawo,” kusho uNdlovu.
ISuperSport izoqala isizini ngaphandle kukaGrant Margerman noBradley Grobler, abalimele. Umqeqeshi wayo, uGavin Hunt, uzobe engekho ebhentshini kulandela ikhadi elibomvu kowokusonga isizini edlule.
Kubhekiwe ukuthi uModiba ukhuluma kanjena nje, uzobe eyingxenye yalo mdlalo yini kulandela inkumo kaManqoba Mngqithi ngabadlali beSundowns abebeyingxenye yeBafana Bafana.
Kusukela uMngqithi ethathe isikhundla kwiSundowns, ubudlelwano phakathi kwakhe nabalandeli abugcwele mfi kodwa imbangela esobala yizinkulumo zakhe.
ISundownsbkaRhulani Mowena ibiyaziwa ngokugcina ibhola kodwa sekucacile ukuthi uMngqithi ukholelwa kwelifika ngokushesha emapalini ezitha.
Okuqapheleke kwiMTN8 ukuthi abalandeli nabadlali beSundowns bebengakangeni khaxa esitayeleni esifunwa uMngqithi okuholele ekutheni leli qembu likhishwe iStellenbosch FC entshontshweni lika-R10 million.
“Abadlali beBafana ngeke bazingenele esikimini kepha kufanele basilwele ngoba bonke abasemabhukwini eSundowns basezingeni elifanayo kimina,” kusho uMngqithi eqeda ukunqoba iSwallows ngempelasonto edlule.
Imidlalo ye-Betway Premiership kuleli sonto:
Kusasa- Ngo-7.30pm: Stellenbosch v Lamontville Golden Arrows (Athlone Stadium); Orlando Pirates v Chippa United (Orlando Stadium); Sekhukhune United v Magesi FC (Peter Mokaba Stadium).
Imiphumela yakamuva eyisithupha yabakhaya baseTshwane (SIDE BAR):
Sundowns 1-1 SuperSport May 2024
SuperSport 0-2 Sundowns Novemba 2023
Sundowns 1-0 SuperSport Januwari 2023
SuperSport 2-1 Sundowns Septhemba 2022
Sundowns 2-0 SuperSport MTN 8 Agasti 2022
SuperSport 0-1 Sundowns Disemba 2021