INHLOKO yabaqeqeshi kwiMamelodi Sundowns, uMiguel Cardoso, yethembise ukusebenzisa igama layo ebholeni lomhlaba ukutholela amadlelo aluhlaza phesheya kwezilwandle abadlali baleli qembu laseChloorkop.
ISundowns enamaphuzu angu-54 emidlalweni yeligi ewu-20, inethuba lokuqhubeka nokwengeza egebeni elesabekayo elivule kwi-log njengoba izobhekana neLamontville Golden Arrows ngo-7.30 ebusuku eMpumalanga Stadium, eHammarsdale.
UCardoso wasePortugal, ufike kwezwakala kwiSundowns okufakazelwa wukuhlala kwayo ngokukhululeka esicongweni njengoba isizini isiyela ngasekugoqweni.
Lo mqeqeshi osuka kwi-Esperance Sportive de Tunis yaseTunisia, ugonyuluke nangethuba lokukhuphula igama lakhe ebholeni lomhlaba athe ufike walibona kwiSundowns.
"Engisheshe ngakuqaphela wukuthi iSundowns igqishe ngabadlali osekunesikhathi bakulungela ukudlalela amaqembu asemaligini athathwa njengamakhulu ebholeni lomhlaba," kusho uCardoso.
"Ngaziwa cishe umhlaba wonke ngebhola ngakho-ke ngizolisebenzisa igama lami ukutholela abadlali beSundowns umsebenzi emaqenjini aphesheya kwezilwandle.
“Lokhu ngeke kugcine ngokusiza iSundowns ngokuyakhela isithunzi nangakwezomnotho kodwa kuzokhuphula negama lami kwazise laba badlali bazobe bekade besebenza ngaphansi kwesandla sami."
Umdlalo weSundowns ne-Arrows usubhekwe ngabomvu kwazise kuzobe kubhekene kuwona abaqeqeshi abashiyelane isihlalo eChloorkop. Lokhu kulandela ukubuyela kukaManqoba Mnqithi ebhentshini le-Arrows okuvela ukuthi usayine kuyona inkontileka ende.
Akungatshazwa ukuthi amehlo azobe ethe njo kulaba baqeqeshi okudalwa nayindlela uMngqithi akhonjwa ngayo indlela eyadweba isithombe sokuthi iSundowns yayisikade ivele iqalile ikhuluma noCardoso. Ngeke kwethuse uma kungagcina kuvela ukuthi uMnqgithi ukuqondanise ngabomu ukuthi emdlalweni wakhe wokuqala kwi-Arrows abhekane neSundowns.
Nakuba iSundowns ivamise ukuzidlela amahlanga kwi-Arrows kodwa kulokhu kuhlukile kwazise Abafana Bes’thende bazobe beholwa ngumqeqeshi obazi ukusuka nokuhlala abadlali baleli qembu lasePitoli.
Okukhulu kunakho konke okubhekene noMngqithi kufanele ukuba kuseqhulwini ukuqeda ukhondolo lokugqoza kwemiphumela okulokhu kulihlehlise nyova njalo kwi-log. Kuyaqapheleka lokhu ngoba i–Arrows ibibalwa namanye ayiqale kahle isizini.
Yize iSundowns ijwayele ukuyishaya ngenqwaba i-Arrows uma behlangene kodwa kufanele kumthobe inhliziyo uMngqithi ukuthi njalo uma lokhu kwenzeka kusuke kungewona umdlalo wasekhaya.
Kuyaphoqa ukuthi uMngqithi ashintshe ukuqalaza kwazise umlando ukhomba ukuthi kwemine yakamuva phakathi kwala maqembu, iSundowns ishaye amagoli angu-13, kwangangena lutho kuyona.
