XOLILE MPISANE
INHLOKO yabaqeqeshi kwiMamelodi Sundowns, uMiguel Cardoso, nomdlali uLucas Ribeiro Costa yibona abadle umhlanganiso kuma-Betway Premiership Awards enyanga kaFebhuwari.
UCardoso uqokwe njengomqeqeshi ovelele, kwathi uRibeiro waqokwa njengomdlali ovelele kule ligi.
NgoFebhuwari amaBrazilian aqoqe amaphuzu angu-18 kwangu-21 ngenxa yokunqoba imidlalo eyisithupha kweyisikhombisa ayidlalile.
Aqumbe phansi i-Lamontville Golden Arrows, SuperSport United, Orlando Pirates, Marumo Gallants, TS Galaxy neSekhukhune, ahlulwa yiGalaxy kuphela emdlalweni obuseMbombela Stadium, eMpumalanga.
UCardoso ushaye emakhanda abaqeqeshi abebanga nabo le ndondo okubalwa kubona abebeqesha ngokubambisana kuMaZulu FC, u-Arthur Zwane noVusumuzi Vilakazi kanye noRonnie Gabriel weRichards Bay FC.
URibeiro ugqame kakhulu ngoFebhuwari njengoba ebe nesandlala emagolini ayisishiyagalombili ashaywe yiqembu lakhe. Ashaye ayisihlanu, waphinde waba ngumvusi wenyamazane kwamathathu.
Udle umhlanganiso uma eqhathaniswa nabanye abagqamile okunguzakwabo u-Iqraam Rayners, noKeletso Magalwa weSekhukhune United.
Ngaphezu kokudla indondo yePlayer of The Month, uRibeiro ukhale wemuka neyeGoal of The Month ngegoli alishaye ngesikhathi benqoba i-Orlando Pirates ngo 1-0 lapho esuke khona nebhola maphakathi nenkundla waze wayolibeka phakathi.
Leli goli livotelwe ngaphezu kwe-freekick yomdlali weCape Town City, uTshegofatso Nyama, ayishaye bebhekene neLamontville Golden Arrows. Lehlule nembumbulu yeshodi umdlali weSekhukhune United, uShaune Mogaila, ayidedele bedlala neChippa United.