SITHI sisazoqhubeka nokungawakhethi amabanga esiwagijimayo isibabuli somgijimi, uBayanda Walaza, esisanda kwenza ezibukwayo kwiGauteng North Championships nakwi-Athletics South Africa (ASA) Grand Prix muva nje.
UWalaza (19) bekungakapholi maseko egile izimanga eqopha irekhodi likazwelonke laseNingizimu Afrika ngokushaya isikhathi esingu-9.99 sec ebangeni lika-100m edla isicoco seGauteng North Championships ngoMgqibelo odlule, eba ngumgijimi wokuqala waseNingizimu Afrika ku-Under 20 ukubeka lesi sikhathi.
Uphinde wenza into yamehlo ngoLwesithathu edla umhlanganiso emlenzeni wesibili we-ASA Grand Prix, e-University of Johannesburg, eGoli, ebangeni lika-200m.
Nasemjahweni weGrand Prix, uWalaza wenze into yamehlo ku-200m ebeka irekhodi elisha lika-Under 20 kuleli banga ngesikhathi esingu-20.34 sec. Ushiye othulini uLucky Monyane, olale isibili ngo-20.36 sec, noLuxolo Adams olale isithathu, ngo-20.43 sec. Uphule irekhodi likaClarence Munyai lika-20.10 sec, lango-2017.
Usevele uzibekisele indawo kwi-World Athletics Championships ezoba seJapan, ngoSepthemba.
Lo mgijimi odlondlobala ngesikhulu isivinini uqophe umlando ngokuba ngumgijimi wokuqala waseNingizimu Afrika oneminyaka engu-18 ukubuya nendondo kuma-Olympic Games. Wayeyingxenye yeqembu lakuleli le-relay ka-100m elathola indondo yesiliva eParis, eFrance, nyakenye.
Usebheke ukuyoyibamba kwi-ASA Senior Track and Field Championships ezoba sePotchesfstroom, eNorth-West, ngo-Ephreli 24-26.
“Mhla ngafinyelela ezingeni lejubane elingijabulisayo, yilapho engiyoqala khona-ke ukukhetha imijaho engiyigijimayo,” kusho uWalaza.
Uthe bavumelene nomqeqeshi wakhe ukugxila kuwona womabili amabanga, u-100m no-200m, ePotchefstroom, nakuba bengakakasithathi isinqumo ngama-World Athletics Championships.
“Sisazothatha isinqumo ngomjaho okuyiwona okuzofanele ngigijime kuwo (eJapan), kodwa futhi njengoba ngizizwa nginamandla ngikholwa wukuthi ngingayibamba kuwona womabili amabanga,” kusho uWalaza.
Ngakolunye uhlangothi, intokazi esencane, uTumi Ramokgopa (17), ikhombise izimpawu zokuba ngumgijimi osemncane othembisayo iqopha irekhodi elisha lika-Under 20 kwabesifazane ebangeni lika-100m hurdles ngesikhathi esingu-13.22 sec, iphula elikaTalyon Bieldt lango-2016.
Nakuba le ntokazi ilale isibili ngemuva kukaMarione Fourie odle umhlanganiso ngo-12.69 sec, kodwa ukubeka kwayo leli rekhodi yikho okuthathe amehlo kulo mjaho.
“Ngijabule ngendlela eyisimanga, angikholwa ngempela. Yize bengazi ukuthi ukubhekana kwami noMarione kuzongigqugquzela ekwenzeni ngokungaphezulu, kodwa bengingalindele ukuthi ngenze ngale ndlela engenze ngayo.
Ukwephula irekhodi ngonyaka wami wokuqala ngigjima kumajuniya kusho lukhulu kimina,” kusho uRamokgopa, ngezwi elinesibibithwane.