ISIKHWISHIKHWISHI samaBhokobhoko, uCheslin Kolbe, semuke nendondo enkulu ngesikhathi kuklonyeliswa abavelele embhoxweni wakuleli ngonyaka odlule kumaSA Rugby Awards ngoLwesine ebusuku.
UKolbe (31), uqokwe njengomdlali ovelele kuleli kwabesilisa, iSA Rugby Men’s Player of the Year, emcimbini obubanjelwe e-International Convention Centre, eKapa.
Umdlali wamaBhokobhoko esifazane ophinde adlalele neqembu lesizwe leSevens, uNadine Roos, uyena obashaye emakhanda emunxeni wabesifazane, iSA Rugby Women’s Player of the Year.
UKolbe uqwaqwade ozakwabo eqenjini lesizwe okubalwa kubona u-Ox Nche, Damian de Allende, Pieter-Steph du Toit no-Eben Etzebeth, othathe le ndondo ngo-2022 nango-2023.
Ngonyaka odlule amaBhokobhoko anqobe imidlalo engu-11 kwengu-23 ayidlalile. Achayiswa yi-Ireland ne-Argentina kuphela, ehlulwa ngephuzu elilodwa kuyona yomibili imidlalo.
Lokho kuholele ekutheni umqeqeshi, uRassie Erasmus, aklonyeliswe ngendondo yeCoach of the Year, amaBhokobhoko athola eyeTeam of the Year.
Abadlali abasebancane, uSacha Feinberg-Mngomezulu noJurenzo Julius, baphume phambili eminxeni ehlukene, kwathi umakadebona, uSelvyn Davids, waqokwa njengeSpringbok Sevens Player of the Year.
“Ukuklonyeliswa kukaCheslin kuwubufakazi bekhono lakhe, ukuzinikela kanye nomthelela omuhle anawo enkundleni,” kusho isikhulu esiphezulu seSA Rugby, uMark Alexander.
“Umdlali wokugcina wasemuva owathola lo mklomelo omkhulu kwakunguJean de Villiers ngo-2013, njengoba usuthathwe uCheslin kulo nyaka. Kuwumvuzo wezinto ezimangalisayo azenzele amaBhokobhoko eminyakeni eyisithupha edlule.
“Kuwubufakazi bezinga lo mbhoxo waseNingizimu Afrika. Sibusisiwe ngethalente elimangalisayo, okufakazelwa yilokho okuzuzwe ngabadlali besizwe abafana noNadine, Sacha, Jurenzo noSelvyn.”
Uhlu oluphelele lwabanqobe kumaSA Rugby Awards
SA Rugby Men’s Player of the Year: Cheslin Kolbe
SA Rugby Women’s Player of the Year: Nadine Roos
SA Rugby Young Player of the Year: Sacha Feinberg-Mngomezulu
Springbok Sevens Men’s Player of the Year: Selvyn Davids
Junior Springbok Player of the Year: Jurenzo Julius
Team of the Year: Springboks
Coach of the Year: Rassie Erasmus
Carling Currie Cup Premier Division Player of the Year: Renzo du Plessis (Lions)
Carling Currie Cup First Division Player of the Year: Ashlon Davids (Boland Kavaliers)
Provincial Women’s Player of the Year: Jakkie Cilliers (Bulls Daisies)
OUTsurance Referee of the Year: AJ Jacobs
President’s Award: KwaZulu-Natal Rugby Union
SA Vodacom URC Player of the Season: Sanele Nohamba (Emirates Lions)
SA Rugby Associate Member of the Year: SA Schools Rugby Association (SASRA)