UMISWE isigubhukane umdlalo weMotsepe Foundation Championship obuphakathi kweDurban City neMilford FC eChatsworth Stadium, eThekwini, ngoLwesibili ebusuku, kulandela ukudlula emhlabeni komdlali weCity, uSinamandla "Sgora" Zondi.
Lo mdlalo omiswe iMilford ihamba phambili ngo 1-0 awubange usabuyela enkundleni ngesiwombe sesibili kuqhuma isililo kubadlali, ithimba labaqeqeshi nezikhulu zaleli qembu, kulandela ukuvela kombiko obuqinisekisa ukwedlula emhlabeni komdlali waleli qembu oqulekele enkundleni waphuthunyiswa esibhedlela waphelela khona.
Ngokuthola kweSolezwe ebelikhona kulo mdlalo, uZondi (22) uqulekele enkundleni ngenkathi womabili amaqembu esazifudumeza ngaphambi komdlalo.
Abayangi beqembu bazamile ukumxilonga kwaba nhlanga zimuka nomoya, kwagcina kubizwa i-ambulensi emphuthumise esibhedlela esiseduzane.
Uqhubekile umdlalo kwaze kwaphela isiwombe sokuqala iMiflord ihamba phambili, nokuthe sekufanele zibuyele esiwombeni sesibili kwabe sekumenyezelwa ngokumiswa komdlalo, umiselwa isikhathi esingaziwa.
Official Club Statement pic.twitter.com/q1jeV3WK7a
— Durban City FC (@DurbanCity_FC) April 22, 2025
Ukudlula emhlabeni ngale ndlela kwalo mdlali kwenzeka nje akukapheli minyaka mingaki owayengumdlali weRichards Bay FC, uSiphamandla “Spepe” Mtolo, ashona ngendlela ethi ayifane. NgoMashi ka-2023 waqulekela enkundleni eziqeqesha neqembu wagcina ngokushona.