KUQINISEKISWE izitshudeni ezifunda ezikhungweni ezine ezikhishwe ohlwini lwezibhalisiwe ngaphansi koMnyango weMfundo ePhakeme nokuQeqesha ukuthi iziqu zazo zisemthethweni.
Lokhu kushiwo nguDkt Blade Nzimande, ophethe lo mnyango obeqinisa idolo izitshudeni ezifunda ngaphansi kwezikhungo i-Educor.
Ngeledlule uDkt Nzimande uthe ziyakhishwa ohlwini lwezikhungo ezibhalisiwe kuleli ngenxa yokwehluleka ukuhlangabezana neminye imibandela yomnyango efaka nokuletha imininingwane ethinta ukusebenza kwezimali.
Isitatimende esikhishwe ngumnyango kaNzimande, siveze ukuthi iziqu zezitshudeni ezizithole kulezi zikhungom, zisemthethweni.
Lezi zikhungo ezikhishwe ohlwini lwezibhalisiwe yiCity Varsity (Pty) Ltd, Damelin (Pty) Ltd, Icesa City Campus (Pty) Ltd neLyceum College (Pty) Ltd.
“Siyazi ngomthelela lesi sinqumo esibe nawo sokukhipha lezi zikhungo ohlwini lwezibhalisiwe ikakhulu kulezo zitshudeni ezisaphothula iziqu kuzona. Njengoba sibhekele izikhungo ezizimele nezomphakathi, kuwumsebenzi wethu ukuqinisekisa ukuthi umthetho wezwe uyalandelwa.”
Lesi sitatimende sithe nalabo abasalelwe wukuqedela iziqu zabo kulezi zikhungo, iziqu zabo zisezingeni.
Lezi zikhungo uthe zihlalelwe yijoka lokuqinisekisa ukuthi izitshudeni ezisasele ziphothula iziqu zazo futhi zibhaliswe izivivinyo ngesikhathi esisele.
Sithe umnyango usazimisele ukufaka isandla ukuze lezi zitshudeni zingaphenduki ondingasithebeni.
“Uphiko olubhekele ukubhaliswa kwezikhungo ezizimele emnyangweni, lumatasa nezingcingo ezivela kwizitshudeni ezikhala ngokuthi akukho ukuxhumana okukhona okuvela ezikhungweni ezingaphansi kwe-Educor, mayelana nekusasa lazo. Sinxusa i-Educor ukuthi icacisele umphakathi ngokuzokwenzeka,” kusho isitatimende.
Siveze nokuthi nakuba kunjalo kodwa sisamile isinqumo sokuthi kukhishwe lezi zikhungo ohlwini lwezibhalisiwe kuleli, kuze kube kulungiswa izinkinga ezibhekene nazo.
Selokhu uNzimande ememezele ukukhishwa kwalezi zikhungo ohlwini lwezibhalisiwe kuleli, kunokukhathazeka kulabo abebefunda kuzona.
Umnyango uxwayise ezinye izikhungo ezizimele ukuthi ngeke unanaze ukuzikhipha ohlwini lwezibhalisiwe uma zephula imigomo.
“Sifisa ukuxwayisa nalabo abahlela ukuvula izikhungo ezingombombayi ukuthi sizozivala, umthetho wezemfundo uthi kumele zonke izikhungo zbhaliswe ukuze kuvikeleke isithunzi sezemdundo. Sisebenza namaphoyisa ukuzivala uma sesizazi,” kusho isitatimende.